റാബിത്വ ജനറൽ സെക്രട്ടറി മോസ്​കോയിലെ റഷ്യൻ ചേമ്പർ സന്ദർശിച്ചു

ജിദ്ദ: മുസ്​ലിം വേൾഡ്​ ലീഗ്​ (റാബിത്വ അൽആലം അൽഇസ്​ലാമി) ജനറൽ സെക്രട്ടറി ഡോ. മുഹമ്മദ്​ ബിൻ അബ്​ദുൽ കരീം അൽഇൗസ മ ോസ്​കോയിലെ റഷ്യൻ ഫെഡറേഷൻ സിവിക്​ ചേമ്പർ സന്ദർശിച്ചു. ചേമ്പർ ​പ്രസിഡൻറ്​ സർജി ഒാർഗോനികിഡ്​സും സംഘാംഗങ്ങളുമായി കൂടിക്കാഴ്​ച നടത്തുകയും ചെയ്​തു. റഷ്യയും മുസ്​ലിം ലോകവും തമ്മിലുള്ള സഹകരണം വർധിപ്പിക്കുക, ഭീകരതയും വംശീയതയും നിർമാർജ്ജനം ചെയ്യുക, ഇസ്​​ലാമോഫോബിയ തടയുക, സമൂഹത്തിൽ സമാധാനവും സുരക്ഷയും ഉറപ്പുവരുത്തുക തുടങ്ങിയ വിഷയങ്ങളാണ്​ ചർച്ച ചെയ്​തത്​.

ചേംമ്പറി​​െൻറ ഒരു വർഷത്തെ പ്രവർത്തന റിപ്പോർട്ട്​ ഭാരവാഹികൾ റാബിത്വ​ ജനറൽ സെക്രട്ടറിക്ക്​​ കൈമാറി. ഭീകരതയും വംശീയതവും നേരിടാനും നിർമാർജ്ജനം ചെയ്യാനും വിവിധ മതവിഭാഗങ്ങൾക്കിടയിൽ സ്​നേഹസംവാദങ്ങൾ വർധിപ്പിക്കാനും സൗഹൃദവും സമാധാനവും നിലനിർത്താനും വേണ്ട പ്രവർത്തനങ്ങൾക്ക് ചേമ്പറുമായി​ ധാരാണാപത്രത്തിൽ ഒപ്പുവെച്ചു.