ഹജ്ജ്​ ഒരുക്കം: പ്രദർശനം മക്ക ഗവർണർ ഉദ്​ഘാടനം ചെയ്​തു

ജിദ്ദ: ഹജ്ജ്​ ഒരുക്കങ്ങളുടെ മുന്നോടിയായി സംഘടിപ്പിച്ച പ്രദർശനവും സംഗമ പരിപാടിയും മക്ക ഗവർണർ അമീർ ഖാലിദ്​ അ ൽഫൈസൽ ഉദ്​ഘാടനം ചെയ്​തു. ജിദ്ദ ഹിൽട്ടൽ ഹോട്ടലിൽ നടക്കുന്ന ദ്വിദിന പരിപാടി ആഭ്യന്തര ഹജ്ജ്​ സർവീസ്​ കോഒാഡിനേഷൻ കൗൺസിലാണ്​ സംഘടിപ്പിക്കുന്നത്​. മക്ക ഡെപ്യൂട്ടി ഗവർണർ അമീർ ബദ്​ർ ബിൻ സുൽത്താൻ, ഹജ്ജ്​ ഉംറ മന്ത്രി ഡോ. മുഹമ്മദ്​ സ്വാലിഹ്​ ബിന്ദൻ, ഹജ്ജ്​ സഹമന്ത്രി ഡോ. അബ്​ദുൽ ഫത്താഹ്​ ബിൻ സുലൈമാൻ മുശാത്ത്​, ഹജ്ജ്​ മന്ത്രാലയ അണ്ടർ സെക്രട്ടറിമാർ, മുത്വവഫ്​ സ്​ഥാപന മേധാവികൾ, ആഭ്യന്തര ഹജ്ജ്​ സേവന സ്​ഥാപന മേധാവികൾ എന്നിവർ സന്നിഹിതരായിരുന്നു.

ഉദ്​ഘാടന ശേഷം ഹജ്ജ്​ സേവനവുമായി ബന്ധപ്പെട്ട ഉപകരണങ്ങളും സംവിധാനങ്ങളും പരിചയപ്പെടുത്തുന്ന വിവിധ സ്​റ്റാളുകൾ മക്ക ഗവർണർ സന്ദർശിച്ചു. നാല്​ കരാറുകളും ഗവർണറുടെ സാന്നിധ്യത്തിൽ ഒപ്പുവെച്ചു. ആഭ്യന്തര ഹജ്ജ്​ സ്​ഥാപന തമ്പുകളിൽ ബലിമാംസ കൂപണുകൾ വിതരണം ചെയ്യുന്നതിന്​ ഇസ്​ലാമിക്​ ഡവലപ്​മ​െൻറ്​ ബാങ്കുമായും ‘ഗ്രീൻ ഹജ്ജ്​ തമ്പ്’ പദ്ധതിക്ക്​ ഉമ്മുഖുറാ യൂനിവേഴ്​സിറ്റിക്​ കീഴിലെ ഖാദിമുൽ ഹറമൈൻ ഹജ്ജ്​ ഉംറ ഗവേഷണ​ കേന്ദ്രവുമായും യൂനിവേഴ്​സിറ്റികളിൽ നിന്ന്​ പുറത്തിറങ്ങുന്നവർക്ക്​ ജോലി നൽകാൻ ബിസിനസ്​ അഡ്​മിസ്​​ട്രേഷൻ കോളജിന്​ കീഴിലെ ഹജ്ജ്​ ഉംറ വകുപ്പുമായും ഹജ്ജ്​ സീസണിൽ തമ്പുകളിൽ നിന്ന്​ ബാക്കിയാകുന്ന ഭക്ഷണങ്ങൾ സൂക്ഷിക്കുന്നതിനും ഉപയോഗപ്പെടുത്തുന്നതിന്​ ഇക്​​റാം സൊസൈറ്റിയുമായാണ്​ കരാറുകളിൽ ഒപ്പുവെച്ചത്​.