ഒഴിഞ്ഞ ഫ്ലാറ്റിൽ നിന്ന്​ ദാനം കിട്ടിയ ടേബിൾ എടുത്ത രണ്ട്​ മലയാളികൾ ജയിലിൽ

ദമ്മാം: ഒഴിഞ്ഞുകിടന്ന ഫ്ലാറ്റിൽ നിന്ന് കാവൽകാരനായ ബംഗാളി നൽകിയ ടേബിൾ എടുത്ത ആലപ്പുഴക്കാരായ രണ്ട്​ യുവാക്കൾ ജയിലിൽ. അൽ ഖോബാറിൽ മെക്കാനിക്കൽ ജോലി ചെയ്യുന്ന സുഹൃത്തുക്കളാണ്​ മോഷണക്കുറ്റം ആരോപിക്കപ്പെട്ട്​ ജയിലിലായത്​. ഫ്ലാറ്റിനുള്ളിൽ ലൈറ്റില്ലാത്തതിനാൽ കെട്ടിടത്തിന്​ താഴെ എത്തിച്ച്​ ടേബിൾ വൃത്തിയാക്കുന്നതിനിടയിൽ സമീപത്ത്​ താമസിക്കുന്ന സ്വദേശി കെട്ടിട ഉടമയെ വിളിച്ചുവരുത്തുകയായിരുന്നു.

അദ്ദേഹം ഇവരെ പൊലീസിന്​ കൈമാറി. കാവൽകാരൻ നൽകിയതാണെന്ന്​ അറിയിച്ചിട്ടും ഫലമുണ്ടായില്ല. ഇനി കോടതിയിൽ നിരപരാധിത്വം തെളിയിക്കാനെ ഇവർക്ക്​ അവസരമുള്ളൂ. അതിനിടെ സുഹൃത്തുക്കൾ നടത്തിയ അനുരജ്ഞനശ്രമം വിജയിച്ചില്ല. ഇത്തരം അബദ്ധങ്ങളിൽ പെടാതെ നോക്കണമെന്ന്​ സാമൂഹിക പ്രവർത്തകർ പറഞ്ഞു.