ഡോ. ഫാത്തിമ: നിർമിത ബുദ്ധിയിലും സൗദി വനിതാ മുന്നേറ്റം

ജിദ്ദ: നിർമിത ബുദ്ധിയുടെ കാലത്ത്​ സൗദിയുടെ അഭിമാനമായി മാറിയിരിക്കയാണ്​ ഡോ. ഫാത്തിമ ബഅ്​തമൻ. ‘ആർടിഫിഷ്യൽ ഇൻറ ലിജൻറ്​സ്​’ എന്ന ആധുനിക ശാസ്​ത്ര ശാഖയിൽ പശ്​ചിമേഷ്യയിൽ തന്നെ ഡോക്​ടറേറ്റ്​ നേടിയ ആദ്യവനിത എന്ന പദവിയാണ്​ ഇൗ ജിദ്ദക്കാരിക്ക്​. കാലത്തിന്​ മുന്നേ പറന്ന്​ ശാസ്​ത്രമേഖലയിൽ സ്വയം അടയാളപ്പെടുത്തി അറബ്​ വനിതാ സമൂഹത്തിനും ര ാജ്യത്തിനും ഇവർ കീർത്തി സമ്മാനിച്ചിരിക്കയാണ്​. യന്ത്രങ്ങളുടെ ബുദ്ധിശക്​തി വർധിപ്പിക്കുന്നതിലുള്ള ഗവേഷണമാണിത്​. ​യന്ത്രങ്ങളുടെ സംസാര ഭാഷയോടുള്ള അഭിനിവേശമാണ്​ ഇവരെ ഉയരങ്ങളിലെത്തിച്ചിരിക്കുന്നത്​. യന്ത്രവൽകൃതലോകത്ത്​ അപൂർവ സംഭാവനകൾ അർപ്പിക്കാനുള്ള നിശ്​ചയദാർഢ്യം ഡോ. ഫാത്തിമയുടെ വിജയത്തിന്​ പിന്നിലുണ്ട്​. റൊബോട്ടിലും, സ്​മാർട്ട്​ ഫോണുകളിലും, മറ്റ്​ സമാർട്ട്​ ഉപകരണങ്ങളിലും അറബി ഭാഷയ്ക്കായുള്ള ‘ഓട്ടോമാറ്റിക് സ്പീച്ച്’ സംവിധാനം വികസിപ്പിച്ചാണ്​​ നിർമിതബുദ്ധി ശാഖയിൽ ഇവർ പി.എച്ച്ഡി കരസ്ഥമാക്കിയിരിക്കുന്നത്​.

മനുഷ്യന്​ യന്ത്രവുമായി സംഭാഷണം നടത്തുന്നതുപോലെ യന്ത്രങ്ങൾക്കിടയിലെ പരസ്​പര സംഭാഷണവും ഇതിൽ പെടുന്നു. ഏഴ്​ വർഷത്തോളം റൊബോട്ടുകളോടൊത്തുള്ള പ്രവർത്തനമാണ്​ ഇൗ മേഖലയിലെ ഗവേഷണങ്ങൾക്ക്​ സഹായകമായത്​ എന്ന്​ ഡോ. ഫാത്തിമ പറയുന്നു. അരിസോണ യൂണിവേഴ്​സിറ്റിയിലെ ഇംഗ്ലീഷ്​ പഠനത്തിനിടയിലാണ്​ ഇൗ മേഖലയെ കുറിച്ച്​ ആലോചിച്ചു തുടങ്ങിയത്​. ഇംഗ്ലീഷുകാരല്ലാത്ത ഇംഗ്ലീഷ് സംസാരിക്കുന്നവരെ സഹായിക്കുന്ന കമ്പ്യൂട്ടർ സിസ്​റ്റം രൂപകൽപന ചെയ്​തായിരുന്നു തുടക്കം.​ യന്ത്രങ്ങളുടെ ബുദ്ധി പരീക്ഷിക്കുന്ന ‘ട്യൂറിങ് ​ടെസ്​റ്റി’നെ കുറിച്ച്​ കുടുതൽ പഠിക്കാനും മനസിലാക്കാന​ും​ ഇവർക്ക്​ താൽപര്യമായിരുന്നു. 2003 ലാണ്​ ഇംഗ്ലണ്ടിലെ ഹഡ്​സ്​ഫീൽഡ്​ സർവകലാശാലയിലെ സ്​കൂൾ ഒാഫ്​ കമ്പ്യൂട്ടിങ്​ ആൻറ്​ എൻജിനീയറിങ്ങിൽ നിന്ന്​ ബിരുദം നേടിയത്​.

ഇതേ യൂണിവേഴ്​​സിറ്റിയിൽ നിന്ന്​ തന്നെയാണ്​ അറബി ഭാഷ മനസ്സിലാകുകയും സംസാരിക്കുകയും ചെയ്യുന്ന യ​ന്ത്രങ്ങളെ വികസിപ്പിച്ച്​ ഡോക്​ടറേറ്റ്​ നേടിയത്​. അവസാനിക്കാത്ത ശാസ്​ത്രശാഖയാണ്​ ‘നിർമിതബുദ്ധി’ യെന്ന്​​ ഡോ. ഫാത്തിമ പറയുന്നു. മനുഷ്യ​​െൻറ സങ്കീർണമായ പ്രശ്​ന പരിഹാരങ്ങൾക്ക്​ യന്ത്രങ്ങളെ പ്രാപ്​തമാക്കുകയാണ്​. കഠിന പരിശ്രമം വേണ്ട മേഖലയാണിത്​. പൊതുസമൂഹത്തിനുവേണ്ടിയും പുതുതലമുറയിലെ പിൻഗാമികളായി വരുന്ന വിദ്യാർഥികൾക്കും സഹായകമാകുന്ന കണ്ടുപിടിത്തങ്ങളിലാണ്​ ഇൗ അറബ്​ വനിതക്ക്​ താൽപര്യം. ജിദ്ദയിൽ ആർടിഫിഷ്യൽ ഇൻറലിജൻസ്​ ലാബ്​ ഒരുക്കാനുള്ള തയാറെടുപ്പിലാണ്​ ഡോ.ഫാത്തിമ. ഇൗ മേഖലയിലുള്ള സ്വദേശ വിദേശ കമ്പനികളുമായി ബന്ധപ്പെട്ട്​ പ്രവർത്തിക്കുന്നുമുണ്ട്​.