കെ.സി.എം അബ്​ദുല്ല പ്രവാസത്തോട്​ വിടപറയുന്നു

റിയാദ്​: മാധ്യമപ്രവർത്തകനും സാമൂഹിക പ്രവർത്തകനുമായി റിയാദിലെ പ്രവാസി സാംസ്​കാരികരംഗത്ത്​ സജീവമായിരുന്ന കെ .സി.എം അബ്​ദുല്ല പ്രവാസത്തോട്​ വിടപറയുന്നു. 1998ൽ ആരംഭിച്ച 21 വർഷത്തെ പ്രവാസത്തിനാണ്​ വിരാമം കുറിക്കുന്നത്​. കോഴിക്കോട്​ ജില്ലയിലെ ശിവപുരം സ്വദേശിയായ അബ്​ദുല്ല ശിവപുരം ഇസ്​ലാമിയ കോളജില്‍ നിന്ന് ആര്‍ട്സ് ആൻഡ്​ ഇസ്​ലാമിക് കോഴ്സ്, പൂനൂര്‍ മുബാറക് അറബിക് കോളേജില്‍ നിന്ന് കാലിക്കറ്റ് യൂനിവേഴ്സിറ്റിയുടെ അറബി ഭാഷ അധ്യാപക കോഴ്​സ്​ എന്നിവ പൂര്‍ത്തീകരിച്ച ശേഷമാണ്​ പ്രവാസത്തിൽ ജീവിതം പരീക്ഷിക്കാ​െനത്തിയത്​. സൗദിയിലെ പ്രമുഖ സ്വകാര്യ കമ്പനികളായ അല്‍ജിദാഇ, സോളിഡാരിറ്റി സൗദി തകാഫുല്‍ എന്നിവടങ്ങളില്‍ സേവനമനുഷ്​ഠിച്ചു. 2005 മുതല്‍ ‘ഗള്‍ഫ് മാധ്യമം’ റിയാദ് ബ്യൂറോക്ക്​ വേണ്ടി ലേഖകനായി പ്രവർത്തിച്ചുകൊണ്ട്​ മാധ്യമരംഗത്തേക്ക്​ കടന്നുവന്നു.

2013 ല്‍ മീഡിയവണ്‍ ചാനൽ പ്രവർത്തനം ആരംഭിച്ചതോടെ ടെലിവിഷൻ മാധ്യമപ്രവർത്തനത്തിലും ഒരു കൈനോക്കി. 2018 വരെ റിയാദ് ബ്യൂറോക്ക്​ കീഴിൽ സജീവമായി. റിയാദിലെ മലയാളി സാമുഹിക സാംസ്കാരിക ജനസേവന രംഗത്ത് രണ്ട് പതിറ്റാണ്ടിലധികം നീണ്ട സജീവ സാന്നിദ്ധ്യം കൊണ്ട്​ പ്രവാസികളുമായി ബന്ധപ്പെട്ട നിരവധി തൊഴില്‍, നിയമ പ്രശ്നങ്ങളും ജീവകാരുണ്യവാര്‍ത്തകളും പൊതുശ്രദ്ധയില്‍ കൊണ്ടുവരാനായി. സംഘടനാപ്രവർത്തന രംഗത്തും സജീവമായിരുന്ന അബ്​ദുല്ല റിയാദ് ഇന്ത്യന്‍ മീഡിയ ഫോറം ജനറല്‍ സെക്രട്ടറി, ട്രഷറര്‍ എന്നീ ഭാരവാഹിത്വങ്ങള്‍ വഹിച്ചു. ഒമാനിലെ സലാല ഉള്‍പ്പെടെ മുഴുവൻ ജി.സി.സി രാജ്യങ്ങളിലേയും വിനോദ സഞ്ചാര കേന്ദ്രങ്ങളിലേക്ക്​ റോഡ് മാര്‍ഗം യാത്ര ചെയ്തു. ഭാര്യ നഷീദ പൂക്കാട് 12 വർഷം റിയാദ് ഇൻറര്‍നാഷനല്‍ ഇന്ത്യന്‍ പബ്ലിക്​ സ്കൂളിൽ അധ്യാപികയായിരുന്നു. മക്കള്‍: ഫാതിമ മൈസം, അഹമ്മദ് യാസീന്‍, ഫഹീം അബ്​ദുല്ല. റിയട്ടയേർഡ്​ സ്​കൂൾ അധ്യാപകൻ ബി.സി അഹമ്മദ്​ കോയയാണ്​ പിതാവ്​. മാതാവ്​ പരേതയായ ആയിഷ.