ബലദിയ ലൈസൻസിന് അഞ്ച്​ വർഷം വരെ കാലാവധി

റിയാദ്: സൗദിയിൽ സ്ഥാപനങ്ങൾക്ക് തദ്ദേശ ഭരണ മന്ത്രാലയം നൽകുന്ന ബാലദിയ ലൈസൻസി​​െൻറ കാലാവധി അഞ്ച്​ വർഷം വരെ നീട്ടാൻ വകുപ്പു മന്ത്രിയുടെ താൽകാലിക ചുമതല വഹിക്കുന്ന മാജിദ് അൽഖസ്‌ബി ഉത്തരവിറക്കി. സ്ഥാപനങ്ങളുടെ സൗകര്യം പരിഗണിച്ചാണ് കാലാവധി നീട്ടാൻ തീരുമാനിച്ചതെന്ന് മന്ത്രാലയം വ്യക്തമാക്കി. മന്ത്രിയുടെ ഉത്തരവിറങ്ങി ഒരു മാസത്തിന് ശേഷമാണ് പരിഷ്‌കരണം പ്രാബല്യത്തിൽ വരിക.
ഇതനുസരിച്ച്​ മൂന്ന് മുതൽ അഞ്ച്​ വർഷം വരെയുള്ള ബാലദിയ ലൈസൻസ് എടുക്കാൻ സ്ഥാപന ഉടമകൾക്ക് സാധിക്കും.

കാലാവധി ദൈർഘ്യത്തിനനുസരിച്ചാണ് ലൈസൻസിന് പണമടക്കേണ്ടത്. ഓരോ വർഷവും ലൈസൻസ് പുതുക്കുക എന്ന പ്രയാസം ഇതോടെ ഇല്ലാതാവും.
തദ്ദേശ ഭരണ മന്ത്രാലയം, മുനിസിപ്പാലിറ്റി, ബാലദിയ എന്നിവയുടെ കീഴിലുള്ള സ്ഥാപനങ്ങൾക്ക് ഈ ആനുകൂല്യം ലഭിക്കുമെന്ന്​ മന്ത്രാലയം പുറത്തിറക്കിയ വാർത്ത കുറിപ്പിൽ വ്യക്തമാക്കി.