33 വർഷത്തിന്​ ശേഷം നാടണയാനൊരുങ്ങി; വിമാന ടിക്കറ്റെത്തും മുമ്പ്​ മരണമെത്തി

റിയാദ്​: പിറന്ന നാട്ടിലേക്ക്​ മട--ങ്ങാൻ 33 വർഷത്തിന്​ ശേഷം അയാളൊരുങ്ങി. വിമാന ടിക്കറ്റ്​ എത്തു​ം മുമ്പ്​ മരണം വന്ന്​ ​കൂട്ടിക്കൊണ്ടുപോയി. തമിഴ്​നാട്ടിലെ തഞ്ചാവൂർ, കുംഭകോണം മേലേകാവേരി സ്വദേശി അബ്​ദുറഹ്​മാ​നാണ്​ (63) വിധിക്ക്​ വഴങ്ങേണ്ടിവന്നത്​. റിയാദിൽ നിന്ന്​ 200 കിലോമീറ്ററകലെ ദവാദ്​മി ജനറൽ ആശുപത്രിയിൽ രണ്ട്​ മാസമായി ചികിത്സയിലായിരുന്ന ഇദ്ദേഹം തിങ്കളാഴ്​ച രാവിലെ 10നാണ്​​ മരിച്ചത്​. രക്തം ഛർദ്ദിച്ച ശേഷം പിടഞ്ഞുവീണ്​ മരണം സംഭവിക്കുകയായിരുന്നു. നാട്ടിൽ കയറ്റിവിടാനായി ഡിസ്ചാർജ്​ വാങ്ങാൻ മലയാളി സാമൂഹിക പ്രവർത്തകൻ ഹുസൈൻ എടരിക്കോട്​ ആശുപത്രി ഡയറക്​ടർ മർസൂഖി​​​​​െൻറ അടുത്തെത്തി സംസാരിച്ചിരിക്കു​േമ്പാഴാണ്​ രോഗിയുടെ നില വഷളായെന്ന്​ നഴ്​സ്​ അറിയിച്ചത്​. വാർഡിലേക്ക്​ ഒാടിയെത്തു​േമ്പാ​ഴേക്കും മരണം സംഭവിച്ചുകഴിഞ്ഞിരുന്നു. എക്​സിറ്റ്​ വിസ ശരിയായെങ്കിലും ഭാരിച്ച തുകയുടെ ആശുപത്രി ബില്ല്​ യാത്രക്ക്​ തടസ്സമായി നിൽക്കുകയായിരുന്നു. 33 വർഷമായി നാട്ടിൽ പോയിട്ടില്ലെന്നും നിർധനനുമാണെന്ന്​ അറിഞ്ഞതോടെ സൗദി ആരോഗ്യ മന്ത്രാലയം 40,000ത്തോളം​ റിയാലി​​​​​െൻറ ബില്ല്​ എഴുതിതള്ളാൻ തയാറായി. ഇൗ വിവരം ഞായറാഴ്​ച വൈകീട്ടാണെത്തിയത്​.

ഇക്കാര്യം പറഞ്ഞ്​ ആശുപത്രിയിൽ നിന്ന്​ വിളി വന്നതിനെ തുടർന്ന്​ ഹുസൈൻ പിറ്റേന്ന്​ രാവിലെ തന്നെ അവിടെയെത്തി ഡിസ്​ചാർജിനും വിമാനടിക്കറ്റിനുമുള്ള ശ്രമങ്ങളാരംഭിക്കുകയും ചെയ്​തു. എന്നാൽ വിധി മറ്റൊന്നായി. 30ാം വയസിൽ സൗദിയിലെത്തിയ അബ്​ദുറഹ്​മാൻ ഇനിയൊരിക്കലും പിറന്ന നാട്ടിലേക്ക്​ മടങ്ങില്ല. ദവാദ്​മിയിൽ തന്നെ ഖബറടക്കാൻ നാട്ടിൽ ആകെയുള്ള ഉറ്റ ബന്ധുക്കളായ ഉമ്മ ഹലീമ ബീവിയും ഏക കൂ​ടപിറപ്പ്​ ഫാത്തിമയും സമ്മത പത്രം നൽകി കഴിഞ്ഞു. ദവാദ്​മിയിലെ ഒരു നിർമാണ കമ്പനിയിലേക്ക്​ ഹെൽപർ വിസയിലാണ്​ ഇയാൾ വന്നത്​. കെട്ടിട, കുഴൽക്കിണർ നിർമാണ ജോലികൾ ചെയ്​തു. ഇതിനിടയിൽ വാഹനമിടിച്ച്​ രണ്ട്​ തവണ ആശുപ​ത്രിയിലായി. പല്ല്​ മുഴുവൻ പോയി. കൃത്രിമ പല്ല്​ വെ​യ്​ക്കേണ്ടിവന്നു. പിന്നീട്​ ദവാദ്​മിയി​ൽ തന്നെ കുറച്ച്​ കൃഷി ഭൂമി പാട്ടത്തിനെടുത്ത്​ പച്ചക്കറി കൃഷി നടത്തി. സമ്പാദിച്ചതെല്ലാം കൊണ്ട്​ പെങ്ങളുടെ കല്യാണം നടത്തി. ഇതിനിടയിലുണ്ടായ അപകടങ്ങൾ കണക്കുകൂട്ടലുകൾ തെറ്റിച്ചു. വലിയ സാമ്പത്തിക ബാക്കിയായി. പച്ചക്കറി കൃഷിയും പച്ച പിടിച്ചില്ല. നാട്ടിൽ പോകാനായില്ല. കാലം കടന്നുപോയി. വിവാഹവും കഴിച്ചില്ല. ഒടുവിലത്തെ അഞ്ചു വർഷം ദവാദ്​മിയിലെ ജി.എം.സി സർവീസ്​ സ്​റ്റേഷനിൽ ജോലി ചെയ്യുന്നതിനിടയിലാണ്​ രണ്ട്​ മാസം മുമ്പ്​ റോഡിൽ തളർന്നുവീണു ആശുപത്രിയിലായത്​.

അസുഖത്തിന്​ ഒരുവിധം ശമനമായപ്പോഴാണ്​ നാട്ടിൽ അയക്കാൻ ദവാദ്​മി കെ.എം.സി.സി ഭാരവാഹി കൂടിയായ ഹുസൈൻ എടരിക്കോട്​ സഹായിക്കാനെത്തിയത്​. കാലാവധി കഴിഞ്ഞ പാസ്​പോർട്ടിന്​ പകരം ഇന്ത്യൻ എംബസി ഒൗട്ട്​ പാസ്​ നൽകി. കമ്പനിയധികൃതർ എക്​സിറ്റ്​ വിസയും നൽകി. ആശുപത്രി ബില്ല്​ എങ്ങനെയെങ്കിലും അടച്ച്​ ഡിസ്​ചാർജ്​ വാങ്ങാനുള്ള ശ്രമത്തിനിടെ ആരോഗ്യമന്ത്രാലയത്തി​​​​​െൻറ കനിവുമുണ്ടായി. ബില്ല്​ എഴുതിത്തള്ളി. ഡിസ്​ചാർജും അനുവദിച്ചു. പക്ഷേ, വിധി അനുവദിച്ചില്ല. ഇതേ ആശുപത്രിയുടെ മോർച്ചറിയിലേക്ക്​ മാറ്റിയ മൃതദേഹം വ്യാഴാഴ്​ച ദവാദ്​മിയിൽ ഖബറടക്കും. ഹുസൈനും ശഖ്​റ കെ.എം.സി.സി ഭാരവാഹി അമീറുദ്ദീനും ഇതിനുവേണ്ടിയുള്ള പ്രവർത്തനങ്ങളിലാണ്​. അതിനിടെ ആശുപത്രിയിൽ കിടന്ന രണ്ട്​ മാസത്തേതുൾപ്പെടെ നാലു മാസത്തെ ശമ്പളവും അഞ്ചുവർഷത്തെ സർവീസാനുകൂല്യവുമടക്കം അബ്​ദുറഹ്​മാ​​​​​െൻറ കുടുംബത്തിന്​ അയച്ചുകൊടുക്കാൻ കമ്പനിയധികൃതർ ഇന്ത്യൻ എംബസിയെ ഏൽപിച്ചിട്ടുണ്ട്​. 33 വർഷത്തിന്​ ശേഷം ആ ഉമ്മയെ തേടി ചെല്ലാനിനി മക​​​​​െൻറ വിയർപ്പി​​​​​െൻറ മണമുള്ള ആ പണം മാത്രം.