മക്കയിലോടാൻ ഒരുങ്ങുന്നത്​ 400 ആധുനിക ബസുകൾ

ജിദ്ദ: മക്ക പൊതുഗതാഗത പദ്ധതിക്ക്​ കീഴിൽ സർവീസ്​ നടത്താൻ 400 പുതിയ ബസുകൾ. ഇതി​​​െൻറ അവസാന ഘട്ട നിർമാണ ​ജോലികൾ പുരോഗമിക്കുകയാണ്​. 2019 അവസാനത്തോടെ നിർമാണവും ഇറക്കുമതിയും പൂർത്തിയാകും. 2020 ൽ സർവീസ് ആരംഭിക്കും. 240 ബസുകൾ 40 സീറ്റുകളുള്ള ഒാർഡിനറിയാണ്​. 160 എണ്ണം ആറ്​ സീറ്റുകളോടും രണ്ട്​ നിലകളോട്​ കൂടിയതാണ്​. നൂതന സാ​േങ്കതിക സംവിധാനങ്ങളോട്​ കൂടിയതാണ് ഒരോ​ ബസും. ടിക്കറ്റിങിന്​ കമ്പ്യൂട്ടർ സംവിധാനവും യാത്രക്കാർക്ക്​ വൈ.ഫൈ സേവനവുമുണ്ടാകും.

പരിസ്​ഥിതിക്ക്​ അനുയോജ്യമായ നിലയിലാണ്​ ബസുകളുടെ നിർമാണം. വികലാംഗർക്ക്​ പ്രത്യേക ഇരിപ്പിടങ്ങൾ, എയർകണ്ടീഷനിങ്​, കാമറകൾ, സൗണ്ട്​ സംവിധാനങ്ങൾ, ഡിജിറ്റൽ സ്​ക്രീനുകൾ എന്നിവയും ബസി​​​െൻറ പ്രത്യേകതകളാണ്​. ബസുകളുടെ നിർമാണം വിദഗ്​ധ കമ്പനിക്ക്​ കീഴിലാണെന്ന്​ മക്ക വികസന അതോറിറ്റി വക്​താവ്​ എൻജി. ജലാൽ കഅ്​കി പറഞ്ഞു. മേന്മകളും രൂപവും എൻജിൻ ശക്​തിയും പരിശോധിക്കുന്ന നടപടികൾ പൂർത്തിയായി. മൂന്നാംഘട്ട നിർമാണ ജോലികളാണി​പ്പോൾ നടന്നു വരുന്നത്​. നിശ്ചിത സമയത്തിനകം ബസുകളുടെ ഇറക്കുമതി പൂർത്തിയാകുമെന്നും അദ്ദേഹം പറഞ്ഞു.

ഇക്കഴിഞ്ഞ വർഷമാണ്​ ബസ്​​ നിർമാണത്തിനും ഇറക്കുമതിക്കും വേണ്ടി സൗദി നെസ്​മ കമ്പനിയും സ്​പാനിഷ്​ കമ്പനിയായ ടി.എൻ.സിയുമായും ചേർന്ന്​ മക്ക ഗവർണർ കരാർ ഒപ്പുവെച്ചത്​. 3.2 ബില്യൺ റിയാൽ ചെലവ്​ വരും. 400 ബസുകളുടെ ഇറക്കുമതി, പത്ത്​ വർഷത്തേക്ക്​ ഒാപറേഷൻ, റിപ്പയറിങ്​ എന്നിവ ഉൾപ്പെട്ടതാണ്​ കരാറെന്നും അദ്ദേഹം പറഞ്ഞു. അതേ സമയം, ബസ്​ സർവീസ്​ ആരംഭിക്കുന്നതോടെ മക്കയിലെ പൊതുഗതാഗതം കൂടുതൽ എളുപ്പവും വ്യവസ്​ഥാപിതവുമാകുമെന്നാണ്​ ഗതാഗത രംഗത്തുള്ളവരുടെ വിലയിരുത്തൽ. ഹറമിലേക്കും തിരിച്ചുമുള്ള യാത്രക്കും ഗതാഗതകുരുക്കൊഴിവാക്കാനും ഇത്​ സഹായിക്കും. കഴിഞ്ഞാഴ്​ചയാണ്​ ബസുകൾക്ക്​ പ്രത്യേക ട്രാക്കുകൾ ഒരുക്കുന്നതിനും അത്യാധുനിക രീതിയിലുള്ള ബസ് ​​സ്​റ്റോപ്പുകൾ ഉണ്ടാക്കുന്നതിനുമുള്ള കരാർ ഒപ്പുവെച്ചത്​. പൊതുഗതാഗത പദ്ധതി എത്രയും വേഗം യഥാർഥ്യമാക്കാൻ മക്ക വികസന അതോറിറ്റിയാണ്​ പദ്ധതിക്ക്​ മേൽനോട്ടം വഹിക്കുന്നത്​.