മമ്മദ്​ തയാറാക്കിയ ഖുര്‍ആന്‍ കൈയെഴുത്തു പ്രതി ഇനി മദീന എക്സിബിഷന്‍ സെൻററിൽ

മദീന: മലപ്പുറം പെരിന്തല്‍മണ്ണ മാനത്ത്മംഗലം സ്വദേശി ചാത്തോലിപ്പറമ്പില്‍ മമ്മദ് എഴുതി തയാറാക്കിയ ഖുര്‍ആന്‍ പ ്രതി മസ്ജിദുന്നബവിക്ക്​ കീഴിലുള്ള മര്‍ക്കസ് മഫ്തൂത്താത്തിലെക്ക് കൈമാറി. കൈയെഴുത്തുകള്‍ സൂക്ഷിക്കുകയും പ്രദര്‍ശിപ്പിക്കുകയും ചെയ്യുന്ന കേന്ദ്രമാണിത്​. മര്‍ക്കസ് ഡയറക്ടര്‍ യാസര്‍ റദ്ദത്തല്ലാ അല്‍ സുബ്ഹി ഏറ്റുവാങ്ങി. മമ്മദി​​​െൻറ പ്രയത്നത്തെ ഡയറക്​ടർ അനുമോദിക്കുകയും നന്ദി പത്രം നൽകുകയും ചെയ്​തു. കൈയെഴുത്തു പ്രതികള്‍ സൂക്ഷിച്ച എക്സിബിഷന്‍ സ​​െൻറര്‍ സന്ദര്‍ശിക്കുന്നവര്‍ക്ക് മമ്മദ് തയാറാക്കിയ ഖുര്‍ആനും കാണാം. ആറ് വര്‍ഷത്തെ നിരന്തര പ്രയത്നമാണിത്​ എന്ന്​ മമ്മദ്​ പറഞ്ഞു.

മദീന കിങ് ഫഹദ് ഖുര്‍ആന്‍ പ്രിൻറിംഗ് പ്രസില്‍ അച്ചടിക്കുന്ന അതേ ലിപിയിലും നിയമാവലിയിലും അത്ര തന്നെ പേജുകളിലുമാണ് കൈയെഴുത്ത്​ പൂര്‍ത്തീകരിച്ചത്. അറബിക് കാലിഗ്രഫി തയാറാക്കാനുപയോഗിക്കുന്ന പ്രത്യേകതരം പേനയും അനുബന്ധ സാമഗ്രികളും സൗദിയില്‍ നിന്നാണ് സംഘടിപ്പിച്ചത്​. 604 പേജുകളിലായി തയാറാക്കിയ ഖുര്‍ആനിന് 94 സെ മീ. നീളവും ,64 സെ.മീ വീതിയും, 6.5 സെ മീ കനവും 27 കിലോഗ്രാം ഭാരവുമാണുള്ളത്. മദീനയിലെ എക്സിബിഷന്‍ സ​​െൻററില്‍ നിലവിലുള്ള എല്ലാ കൈയെഴുത്ത് ഖുര്‍ആന്‍ പ്രതിയെക്കാളും വലിപ്പം കൂടിയതാണ് മമ്മദ് തയാറാക്കിയത്. 69 കാരനായ മമ്മദ് നീണ്ട 39 വര്‍ഷം കേന്ദ്ര സര്‍ക്കാരിന് കീഴിലുള്ള ബി.എസ്.എന്‍.എലില്‍ ജോലി ചെയ്ത് ജെ ടി ഒ തസ്തികയില്‍ വിരമിക്കുകയായിരുന്നു. ഭാര്യ സുഹറ. മക്കള്‍ സമീര്‍, ഷബീര്‍( ഇരുവരും സൗദിയില്‍ ), സലീന.