കിങ് ഫഹദ് ഖുര്‍ആന്‍ പ്രിൻറിംഗ് പ്രസ്സ്: വിശ്വാസികൾക്ക്​ സൗദിയുടെ സമ്മാനം

പ്രവാചക നഗരിയില്‍ തബൂക് റോഡില്‍ സ്ഥിതി ചെയ്യുന്ന കിങ്​ ഫഹദ് ഖുര്‍ആന്‍ പ്രിൻറിംഗ് പ്രസ്സ്​ കഴിഞ്ഞ ഹിജ്റ വര്‍ ഷം (1439) 18 ദശലക്ഷം ഖുര്‍ആന്‍ അച്ചടിച്ച് റെക്കോര്‍ഡിട്ടു. 1984 ല്‍ പ്രവര്‍ത്തനം തുടങ്ങിയ പ്രിൻറിംഗ്​ കോംപ്ലക്സ് ഇന്നും ലോക മുസ്​ലീംകൾക്കുള്ള സൗദി അറേബ്യയുടെ സമ്മാനമായി നിലകൊള്ളുന്നു. സൗദി മതകാര്യവകുപ്പ് നേരിട്ട് നടത്തുന്ന സ്ഥാപനമാണിത്. ഖുര്‍ആന്‍ പ്രബോധനം, പാരായണങ്ങളുടെ റെക്കോർഡിംഗ്, ആശയ വിവര്‍ത്തനങ്ങളുടെയും അനുബന്ധ വിജ്ഞാനീയങ്ങളുടെയും പ്രസാധനം എന്നിവയിലൂടെ ഖുര്‍ആനിന് സേവനം ചെയ്യുകയെന്നതാണ് പദ്ധതിയുടെ ലക്ഷ്യം. കോംപ്ലക്സിന് കീഴിലുള്ള വിവിധ വൈജ്​ഞാനിക തലങ്ങളിലായി നിരവധി പണ്ഡിതന്‍മാര്‍ സേവനമനുഷ്​ഠിക്കുന്നു.

ഖുര്‍ആന്‍ പ്രിൻറിംഗ് ഫോണ്ടുകള്‍ തയാറാക്കുന്നതിനും ഇസ്​ലാമിക ലോകത്ത് പ്രചാരത്തിലുള്ള രിവായത്തുകളുടെ അടിസ്ഥാനത്തില്‍ ഖുര്‍ആന്‍ പാരായണങ്ങള്‍ റെക്കോർഡ് ചെയ്യുന്നതിനുമുള്ള സൂക്ഷ്മ പരിശോധനാസമിതി, വിശുദ്ധ ഖുര്‍ആന്‍ വിജ്ഞാനീയങ്ങളില്‍ ഗവേഷണങ്ങള്‍ നടത്തുന്ന ഗവേഷണ കേന്ദ്രം, 76 ലധികം ലോക ഭാഷകളിലേക്ക് ആശയവിവര്‍ത്തനം നടത്തുന്ന കേന്ദ്രം , ഖുര്‍ആന്‍ ആപ്പുകള്‍ തയാറാക്കുകയും കമ്പ്യൂട്ടര്‍ പതിപ്പുകളുടെ സ്വീകാര്യത ഉറപ്പ് വരുത്തുകയും ചെയ്യുന്ന ഡിജിറ്റല്‍ കേന്ദ്രം തുടങ്ങിയ വ്യത്യസ്ത ശാഖകളും പ്രവര്‍ത്തിക്കുന്നു. അന്ധരായവര്‍ക്ക്​ ബ്രെയ്​ലി ലിപിയിലും ഖുര്‍ആന്‍ അച്ചടിക്കുന്നുണ്ട്​.

1100 ഓളം വരുന്ന ജീവനക്കാരില്‍ 700 ഓളം പേര്‍ക്ക് പ്രൊഡക്ഷന്‍ യൂണിറ്റിലാണ് ജോലി. ജീവനക്കാരില്‍ 86 ശതമാനവും സ്വദേശികളാണ്. ഇതുവരെ 260 പതിപ്പുകളിറക്കിയ കോംപ്ലക്സ് കഴിഞ്ഞ വര്‍ഷം വരെ 320 മില്യണ്‍ കോപ്പികള്‍ പ്രിൻറ്​ ചെയ്തു. വിശുദ്ധ ഖുര്‍ആന്‍, ആശയ വിവര്‍ത്തനങ്ങള്‍, അനുബന്ധ വിജ്ഞാനീയങ്ങള്‍, ഹദീസുകള്‍, നബി ചരിത്രം എന്നിയവയെ ബന്ധപ്പെട്ടുള്ള ചര്‍ച്ചകളും സെമിനാറുകളും സംഘടിപ്പിക്കുന്നതിന് കോംപ്ലക്സ് പ്രത്യേക പരിഗണന നല്‍കുന്നുണ്ട്. ഇടക്കാലത്ത്​ സന്ദര്‍ശന വിലക്കുണ്ടായിരുന്ന ഇവിടേക്ക് വീണ്ടും സന്ദര്‍ശനം അനുവദിച്ചിട്ടുണ്ട്​. മുന്‍കാലങ്ങളില്‍ പുരുഷന്‍മാര്‍ക്ക് മാത്രമായിരുന്ന സന്ദര്‍ശനം ഇപ്പോള്‍ സ്ത്രീകള്‍ക്കും അനുമതിയുണ്ട്​. ഇവിടെ എത്തുന്ന ഓരോ സന്ദര്‍ശകര്‍ക്കും ഖുര്‍ആന്‍ പ്രതി സമ്മാനമായി നല്‍കുന്നുമുണ്ട്.