അബൂദബിയിൽ നിന്ന് കാണാതായ കാസർകോട്​ സ്വദേശി അൽ അഹ്‌സ ജയിലിൽ

ദമ്മാം: അബൂദബിയിൽ നിന്ന്​ കാണാതായ മലയാളി യുവാവ്​ അൽ ഹസയിലെ ജയിലിലുള്ളതായി സ്​ഥിരീകരണം. കാസർകോട്​ നീലേശ്വരം പാലായിൽ ഹാരിസിനെയാണ്​ (28 ) കഴിഞ്ഞ മാസം ഡിസംബർ എട്ടാം തീയതി മുതൽ അബൂദബിയിൽ നിന്ന്​ കാണാതായതായി മാധ്യമങ്ങൾ റിപ്പോർട്ട്​ ചെയ്​തത്​​. തുടർന്ന്​ നടത്തിയ അന്വേഷണങ്ങൾക്കൊടുവിലാണ്​ ഇയാൾ അൽ അഹ്​സയിലെ ജയിലിലുണ്ടെന്ന്​ കണ്ടെത്തിയത്​. ജയിലിൽ ഭക്ഷണം കഴിക്കാതെ മാനസിക അസ്വാസ്​ഥ്യം പ്രകടിപ്പിച്ച ഹാരിസ്​ ഇപ്പോൾ അൽ ഹസ മാനസികാരോഗ്യകേന്ദ്രത്തിലെ ജയിൽ വാർഡിൽ ആണുള്ളത്. അബൂദബി ഹംദാൻ സ്ട്രീറ്റിലെ സ്വകാര്യ കമ്പനിയിൽ ജീവനക്കാരനായിരുന്നു ഹാരിസ്. ഡിസംബർ മാസം നടന്ന സഹോദരീപുത്രിയുടെ വിവാഹത്തിൽ പങ്കെടുക്കാൻ കമ്പനിയോട് അവധി ചോദിച്ചിരുന്നുവത്രെ. അത് ലഭിക്കാതെ വന്നതോടെ വിസ റദ്ദാക്കി ത​െന്ന നാട്ടിലയക്കണമെന്ന്​ ഇദ്ദേഹം വാശിപിടിച്ചു. ജോലിക്ക്​ പകരം സംവിധാനം ഉണ്ടാക്കാനായി 15 ദിവസം കാത്തിരിക്കാൻ കമ്പനി ആവശ്യപ്പെ​െട്ടങ്കിലും അധികൃതരുമായി സംസാരിച്ചു പിണങ്ങി നാടുവിടുകയായിരുന്നു.

സൗദിയുടെ അതിർത്തി കടന്ന ഹാരിസിനെ രേഖകളില്ലാത്തതിനാൽ സൗദി അതിർത്തി സുരക്ഷാസേന കസ്​റ്റഡിയിലെടുക്കുകയും അൽ അഹ്‌സ സെൻട്രൽ ജയിലിനു കൈമാറുകയുമായിരുന്നു. സൗദിയിലേക്ക് നുഴഞ്ഞു കയറി എന്നാണ് കേസ്. ഏകദേശം ഒരു മാസമായി ഹാരിസ് അൽ അഹ്‌സ ജയിലിൽ എത്തിയിട്ട്. ഇയാൾ ശക്​തമായ മാനസിക സമ്മർദം അനുഭവിച്ചിരുന്നതായി സഹതടവുകാർ പറഞ്ഞു. രാജ്യാതിർത്തി ഭേദിച്ചതിനെ തുടർന്നുള്ളള കേസ്​ ഒഴിവായി നാട്ടിലെത്താൻ കൂടുതൽ സമയം വേണ്ടി വന്നേക്കും എന്നറിഞ്ഞതോടെ ​ ഇയാൾ കുടുതൽ സമ്മർദത്തിലായി.ഇതോടെ ജയിലിൽ ആഹാരത്തോട്​ വിമുഖത കാണിക്കുകയും ശാരീരിക അസ്വസ്ഥത പ്രകടിപ്പിക്കുകയും ചെയ്ത ഹാരിസിനെ സാമൂഹ്യ പ്രവർത്തകരുടെ സഹായത്തോടെ ജയിൽ അധികൃതർ ചികിത്സക്കായി അൽഅഹ്‌സ സൈക്യാട്രിക് ഹോസ്പിറ്റലിലേക്ക് മാറ്റി. മാനസികാശുപത്രിയിലെ ജയിൽ വാർഡിൽ ആണ് ഇപ്പോൾ ഹാരിസുള്ളത്. അൽ അഹ്​സയിലെ സാമൂഹ്യ പ്രവർത്തകരായ ഹനീഫയും നാസർ മഅ്​ദിനിയും ഇദ്ദേഹത്തിനെ എത്രയും വേഗം നാട്ടിലെത്തിക്കാനുള്ള ​ശ്രമത്തിലാണ്​.