ജിദ്ദ പുസ്​തകമേള കാണാനെത്തിയവരുടെ എണ്ണം രണ്ടര ലക്ഷം കവിഞ്ഞു

ജിദ്ദ: നാലാത്​ ജിദ്ദ അന്താരാഷ്​ട്ര പുസ്​തകമേള കാണാനെത്തിയവരുടെ എണ്ണം രണ്ടര ലക്ഷം കവിഞ്ഞു. ചൊവ്വാഴ്​ച വരെയുള്ള കണക്കാണിത്​. ബുധനാഴ്​ചയാണ് മക്ക ഗവർണർ അമീർ ഖാലിദ്​ അൽഫൈസൽ പുസ്​തകമേള ഉദ്​ഘാടനം ചെയ്​തത്​. കുടുംബ​ സമ്മേതവും അല്ലാതെയും സ്വദേശികളും വിദേശികളുമായി നിരവധി പേരാണ് മേള കണാനെത്തുന്നത്​. വാരാന്ത്യ അവധി ദിവസങ്ങളിൽ സന്ദർശകരുടെ എണ്ണം ഇനിയും കൂടുമെന്നാണ്​ സംഘാടകർ പ്രതീക്ഷിക്കുന്നത്​. പത്ത്​ ദിവസം നീളുന്ന മേളയിൽ രാജ്യത്തിനകത്തും പുറത്തുമുള്ള 400 ഒാളം പ്രസാധകരുടെ സ്​റ്റാളുകളുണ്ട്​. വിവിധ വിഷയങ്ങളിലായി 1,80,000 പുസ്​തകൾ ഒരുക്കിയിട്ടുണ്ട്​. ബാലസാഹിത്യങ്ങൾ വിൽക്കുന്ന സ്​റ്റാളുകളിലാണ്​ തിരക്ക്​ കൂടുതൽ. സാംസ്​കാരിക പരിപാടികളും ശിൽപശാലകളും സിനിമ പ്രദർശനങ്ങളും ഇതോടനുബന്ധിച്ചുണ്ട്​.