26 ദിവസം മുമ്പ്​ കാണാതായ നാല്​ പേരുടെ മ​ൃതദേഹങ്ങൾ വെള്ള​ക്കെട്ടിൽ മുങ്ങിയ കാറിൽ

ഹഫ​ർ അൽ ബാത്വിൻ: ദുരൂഹ സാഹചര്യത്തിൽ കാണാതായ നാല്​ പേരുടെ മൃതദേഹങ്ങൾ ഹഫർ അൽ ബാത്വിനിലെ വെള്ളക്കെട്ടിൽ മുങ്ങിയ കാറിൽ കണ്ടെത്തി. 26 ദിവസം മുമ്പ്​ കാണാതായവരുടെ മൃതദേഹങ്ങളാണ്​ പൊലീസി​​​െൻറയും സിവിൽ ഡിഫൻസി​​​െൻറയും സംയുക്​ത പരിശോധനയിൽ ലഭിച്ചത്​​. നാല്​ പേരും വാഹനത്തിനുള്ളിൽ മരിച്ച നിലയിലായിരുന്നു.

ഹഫ​ർ അൽ ബാത്വിന്​ വടക്ക്​ ജനവാസമില്ലാത്ത മേഖലയിൽ ഡ്രൈവറുടെ ​തിരിച്ചറിയൽ കാർഡ്​ ഒരാൾക്ക്​ കിട്ടിയതാണ്​ കാണാതായവരെ കണ്ടെത്താൻ സഹായിച്ചതെന്ന്​ ബന്ധപ്പെട്ട വൃത്തങ്ങളെ ഉദ്ധരിച്ച്​ മാധ്യമങ്ങൾ റിപ്പോർട്ട്​ ചെയ്​തു. ഇയാൾ കാർഡ്​ പൊലീസിന്​​ കൈമാറുകയായിരുന്നു. പൊലീസ്​ സ്​ഥലം നിർണയിക്കുകയും സിവിൽ ഡിഫൻസും സന്നദ്ധ സേവന പ്രവർത്തകരുമായി​ സഹകരിച്ച്​ തെരച്ചിൽ നടത്തുകയും ചെയ്​തു. കാർഡ്​ കണ്ടെത്തിയ സ്​ഥലത്തിനടുത്ത വെള്ളക്കെട്ടിലെ ജലം പമ്പ്​ ചെയ്​തു നീക്കിയപ്പോഴാണ് വെള്ളക്കെട്ടിൽ മുങ്ങിയ വാഹനം കണ്ടെത്തിയത്​. മരിച്ചവർ ഏത്​ രാജ്യക്കാരാണെന്ന വിവരം ലഭ്യമായിട്ടില്ല.