ഒപെക് ഉച്ചകോടി: ആറ് രാഷ്​ട്രങ്ങളുടെ പ്രത്യേക യോഗം ബുധനാഴ്​ച

റിയാദ്: എണ്ണവില കുത്തനെ ഇടിഞ്ഞ പശ്​ചാത്തലത്തിൽ വ്യാഴാഴ്​ച ഒപെക്​ ഉച്ചകോടി വിയന്നയിൽ നടക്കുന്നതിന്​ മന്നോടിയായി സൗദി, കുവൈത്ത്, അള്‍ജീരിയ, വെനിസുല, റഷ്യ, ഒമാന്‍ രാഷ്​ട്രങ്ങള്‍ ബുധനാഴ്​ച പ്രത്യേകയോഗം ചേരും. വിയന്നയിൽ തന്നെയാണീ യോഗം. പ്രമുഖ ഉല്‍പാദക രാഷ്​ട്രമായ സൗദിയുടെ നീക്കം ഉച്ചകോടിയുടെ തീരുമാനത്തെ സ്വാധീനിക്കുമെന്നാണ് സാമ്പത്തിക വിദഗ്​ധര്‍ പ്രതീക്ഷിക്കുന്നത്. സൗദി തീരുമാനത്തിന് റഷ്യയുടെ പിന്തുണ ലഭിച്ചേക്കും. 20 ശതമാനത്തോളം വിലയിടിവ് സംഭവിക്കുകയും കഴിഞ്ഞ 14 മാസത്തിനിടക്കുള്ള ഏറ്റവും കുറഞ്ഞ വിലയിലേക്ക് കൂപ്പു കുത്തുകയും ചെയ്ത സാഹചര്യത്തിലാണ് ഒപെക് ഉച്ചകോടി പ്രസക്തമാവുന്നത്.

എണ്ണക്ക് അന്താരാഷ്​ട്ര വിപണിയില്‍ ബാരലിന് 50 ഡോളര്‍ വരെ വിലയിടിവ് നേരിടുന്നുണ്ട്​. വ്യാഴാഴ്ചയാണ്​ വിയന്നയില്‍ ഉച്ചകോടി. ഒപെകിന് പുറത്തുള്ള റഷ്യ ഉള്‍പ്പെടെ പ്രമുഖ രാജ്യങ്ങൾ ഉച്ചകോടിയില്‍ പങ്കെടുക്കും. 25 എണ്ണ ഉല്‍പാദക രാഷ്​ട്രങ്ങള്‍ ഉച്ചകോടിക്കെത്തുമെന്നാണ് പ്രതീക്ഷിക്കുന്നത്. ഉല്‍പാദന നിയന്ത്രണം ഫലം കാണാത്ത സാഹചര്യത്തില്‍ ഉല്‍പാദനം വലിയ തോതിൽ വെട്ടിക്കുറക്കുന്നതിനെക്കുറിച്ച് ഒപെകിനകത്തും പുറത്തുമുള്ള എണ്ണ കയറ്റുമതി രാഷ്​ട്രങ്ങള്‍ ആലോചിച്ചേക്കും. വിപണിയില്‍ ആവശ്യത്തിലധികം സ്​റ്റോക്​ ഉള്ളതാണ് വിലയിടിവിന് കാരണമെന്നാണ് പ്രത്യക്ഷ വിലയിരുത്തല്‍. ഉല്‍പാദന നിയന്ത്രണത്തിന് തങ്ങള്‍ തയാറാണെന്നും ഉച്ചകോടി ഈ തീരുമാനത്തിലേക്കെത്തുമെന്നാണ് പ്രതീക്ഷിക്കുന്നതെന്നും ഒമാന്‍ എണ്ണ മന്ത്രി മുഹമ്മദ് ബിന്‍ ഹമദ് അല്‍റുംഹി പറഞ്ഞു.