55 കവർച്ചക്കേസുകളിലെ പ്രതികളെ പിടികൂടി

റിയാദ്​: നഗരത്തിൽ കവർച്ച തൊഴിലാക്കിയ എട്ടംഗ സംഘത്തെ റിയാദ്​ പൊലീസ്​ അറസ്​റ്റ്​ ചെയ്​തു. കവർച്ചയും പണതട്ടിപ്പുകളും മറ്റും അന്വേഷിക്കാൻ റിയാദ്​ പൊലീസിന്​ കീഴിൽ നിയോഗിക്കപ്പെട്ട പ്രത്യേക കുറ്റന്വേഷണ സംഘത്തി​​െൻറ വലവിരിച്ചുള്ള അന്വേഷണത്തിലാണ്​ കൊടും കുറ്റവാളികളായ സംഘത്തെ പിടികൂടിയത്​. ആറ്​ സിറിയൻ പൗരന്മാരും രണ്ട്​ സൗദി പൗരന്മാരുമാണ്​ പ്രതികൾ. നഗരത്തിലെ വിവിധ ഭാഗങ്ങളിലുള്ള കടകളും സ്ഥാപനങ്ങളും കുത്തിത്തുറന്ന്​ കൊള്ളയടിച്ച സംഭവങ്ങളാണ്​ സംഘം നടത്തിയത്​.

എയർകണ്ടീഷണറുകൾ ഘടിപ്പിച്ചിരിക്കുന്ന ചുവരിലെ ഭാഗം തകർത്ത്​ അകത്തുകടന്ന്​ പണവും മറ്റ്​ സാധനങ്ങളും കവരുന്നതാണ്​ രീതിയെന്ന്​ പ്രതികൾ കുറ്റസമ്മതം നടത്തി. ഇത്തരത്തിൽ 55 കവർച്ചകൾ സംഘം നടത്തിയതായി പൊലീസ്​ അന്വേഷണത്തിൽ വ്യക്തമായി. ജുഡീഷ്യൽ നടപടിക്കായി ബന്ധപ്പെട്ട വിഭാഗത്തിന്​ പൊലീസ്​ പ്രതികളെ കൈമാറി.