മഴക്ക്​ ശമനം; റോഡുകൾ സാധാരണ നിലയിലേക്ക്​

ജിദ്ദ: സൗദിയിൽ ഒരാഴ്​ചയോളം നീണ്ട മഴക്ക്​ ശമനം. ജിദ്ദയിൽ ശനിയാഴ്​ച രാ​ത്രി വൈകിയും കനത്ത മഴയും കാറ്റും ഉണ്ടായിരുന്നു. ഇതിനിടെ റുവൈസിൽ മലയാളി ഷോക്കേറ്റു മരിച്ചു. കോർണിഷിൽ അസാധാരണമാം വിധം ചെങ്കടലിൽ നിന്ന്​ തിരയടിച്ച്​ റോഡിലെത്തി. ശനിയാഴ്​ച മക്ക മേഖലയിൽ 164 പേർ സഹായം തേടി വിളിച്ചതായി സിവിൽ ഡിഫൻസ്​ അറിയിച്ചു. വെള്ളക്കെട്ടിൽ കുടുങ്ങിയ 20 പേരെ രക്ഷപ്പെടുത്തി​. ത്വാഇഫിൽ ഒമ്പതുപേരെ രക്ഷപ്പെടുത്തി. അല്ലീതിൽ രക്ഷാപ്രവർത്തനത്തിന്​ സുരക്ഷ ഹെലികോപ്​റ്ററുമുണ്ടായിരുന്നു. താഴ്​വരയിൽ കുടുങ്ങിയ ഇൗജിപ്​ത്​, യമൻ, നേപ്പാളി രാജ്യക്കാരായ മൂന്നുപേരെ ഹെലികോപ്​റ്റർ വഴി രക്ഷപ്പെടുത്തിയതായി സിവിൽ ഡിഫൻസ്​ വക്​താവ്​ പറഞ്ഞു.

മഴയെ തുടർന്ന്​ മക്ക മേഖലയിൽ അടച്ചിട്ട തുരങ്കങ്ങളും റോഡുകളും തുറന്നു. സിവിൽ ഡിഫൻസും മുനിസിപ്പാലിറ്റിയും സഹകരിച്ചാണ്​ റോഡുകളിലെ തടസ്സങ്ങൾ നീക്കിയത്​. മക്ക മേഖലയിൽ കൂടുതൽ മഴക്കെടുതി അല്ലീത്​ മേഖലയിലാണ്​. പ്രദേശത്തെ കിഴക്ക്​ ഭാഗത്തുള്ള മർകസ്​ ബനീ യസീദ്​, ഉദ്​മ്​, റഹ്​വ എന്നിവിടങ്ങളിൽ ശനിയാഴ്​ച ഉച്ചക്ക്​ ശേഷം ഒന്നര മണിക്കൂറിലധികം നീണ്ട മഴയിൽ ഒറ്റപ്പെട്ടു. താഴ്​വരകൾ നിറഞ്ഞൊഴുകി. റോഡുകൾ അടച്ചു. വൈദ്യുതി പോസ്​റ്റുകൾ വീണതിനെ തുടർന്നു വൈദ്യുതി വിതരണം നിർത്തിവെച്ചു. ഇതേ തുടർന്ന്​ പെട്രോൾ പമ്പുകളുടെ പ്രവർത്തനം നിലച്ചു. പലയിടങ്ങളിലും ഫുട്​​പാത്തുകൾ തകർന്നു. വാഹനങ്ങൾ വെള്ളത്തിൽ കുടുങ്ങി. അടുത്തിടെയെന്നും ഇത്ര ശക്​തമായ മഴ പ്രദേശ​ത്തുണ്ടായിട്ടില്ലെന്നാണ്​ ​ പ്രദേശവാസികൾ പറഞ്ഞു​.