വിമാനം വൈകുന്നത് 45 മിനുട്ട് മുമ്പ് അറിയിക്കണം -സിവില്‍ എവിയേഷന്‍

റിയാദ്: വിമാനം വൈകുന്ന സാഹചര്യത്തില്‍ ചുരുങ്ങിയത് 45 മിനുട്ട് മുമ്പെങ്കിലും യാത്രക്കാരെ വിവരമറിയിക്കണമെന്ന് സൗദി സിവില്‍ എവിയേഷന്‍ അതോറിറ്റി നിർദേശിച്ചു. ഉപഭോക്തൃ അവകാശ സംരക്ഷണത്തി​​​െൻറ ഭാഗമായാണ് നിര്‍ദേശമെന്ന്​ അതോറിറ്റി കൂട്ടിച്ചേര്‍ത്തു. വൈകുന്ന വിമാനം പുറപ്പെടുന്ന സമയം കൃത്യമായി യാത്രക്കാരെ അറിയിച്ചിരിക്കണം. സർവീസ്​ വൈകുന്ന സാഹചര്യത്തില്‍ യാത്രക്കാര്‍ക്ക് ഭക്ഷണം, താമസം എന്നിവയും കമ്പനി ഒരുക്കണം. ആദ്യ മണിക്കൂറില്‍ ശീതളപാനീയം പോലുള്ളവയാണ്​ നല്‍കേണ്ടത്.

മൂന്ന് മണിക്കൂര്‍ വൈകുന്ന സാഹചര്യത്തില്‍ മുഖ്യഭക്ഷണം നല്‍കണം. ആറ് മണിക്കൂര്‍ വൈകുന്ന സാഹചര്യത്തില്‍ ഹോട്ടലിൽ താമസവും നല്‍കിയിരിക്കണം. അന്താരാഷ്​ട്ര റൂട്ടിലുള്ള വിമാനം 14 ദിവസത്തിനകം റദ്ദ് ചെയ്യുകയാണെങ്കില്‍ ടിക്കറ്റ് സംഖ്യ പൂര്‍ണമായോ ഭാഗികമായോ തിരിച്ചുനല്‍കുന്നതോടൊപ്പം തത്തുല്യ സംഖ്യക്കുള്ള നഷ്​ടപരിഹാരവും നല്‍കണം. ആഭ്യന്തര റൂട്ടിലുള്ള വിമാനങ്ങള്‍ ഏഴ് ദിവസത്തിനകം റദ്ദ് ചെയ്താലും ഇതേ രീതിയില്‍ നഷ്​ടപരിഹാരം നല്‍കാന്‍ വിമാന കമ്പനി ബാധ്യസ്​ഥമാണെന്ന് സിവില്‍ എവിയേഷന്‍ അതോറിറ്റി വിശദീകരിച്ചു.