മക്ക ഹറം ശുചീകരണത്തിന്​ ആദ്യമായി സ്വദേശികൾ

ജിദ്ദ: മക്ക ഹറമിൽ ശുചീകരണ​ ജോലികൾക്ക്​​ 85 സ്വദേശികൾ. ഹറം കാര്യാലയത്തിന്​ കീഴിലെ ശുചീകരണ, കാർപറ്റ്​ വകുപ്പിന്​ കീഴിലാണ് സ്വദേശികൾ ജോലി ചെയ്യുന്നത്​​. ആദ്യമായാണ്​ ക്ലീനിങ്​​ രംഗത്ത്​ സ്വദേശികളെ നിയമിക്കുന്നത്​. വണ്ടി പ്രവർത്തിപ്പിക്കുന്നതിനും റിപ്പയറിങിനും വേണ്ട പരിശീലനവും തൊഴിൽ രംഗത്ത്​ ശ്രദ്ധിക്കേണ്ട പെരുമാറ്റ രീതികൾ സംബന്ധിച്ച്​ ബോധവത്​കരണ ക്ലാസുകളും ഇവർക്ക്​ നൽകിയിട്ടുണ്ട്​. നേരത്തെ ശുചീകരണത്തിന്​ ഉപയോഗിച്ചിരുന്ന പഴയ മെഷീനുകളെല്ലാം മാറ്റി പുതിയത്​ ഒരുക്കിയതായി​ വകുപ്പ്​ മേധാവി നാഇഫ്​ ജഹ്​ദലി പറഞ്ഞു.

വിദഗ്​ധരായ സ്വദേശികളുടെ സംഘമാണ്​ ഇവ പ്രവർത്തിപ്പിക്കുക. ക്ലീനിങ്​ ര​ംഗത്തെ പഴയ രീതി മാറ്റി പുതിയ സംവിധാനങ്ങളൊരുക്കാനാണ്​ ശ്രമിച്ചുകൊണ്ടിരിക്കുന്നതെന്നും അദ്ദേഹം പറഞ്ഞു. ലോകമുസ്​ലിംകളുടെ ഖിബ്​ലയും പുണ്യഗേഹവുമായ വിശുദ്ധ ഹറമിൽ സേവനനിരതരാകാൻ തെരഞ്ഞെടുത്തതിൽ ഏറെ സന്തോഷമുണ്ടാക്കുന്നുവെന്ന്​ സ്വദേശികളായ യുവാക്കൾ പറഞ്ഞു. ക്ലീനിംഗ്​ രംഗ​ത്ത്​ നിയോഗിക്കുന്ന സ്വദേശികളുടെ ആദ്യസംഘമാണ്​ ഞങ്ങൾ. അതിൽ വളരെ അഭിമാനമാനമുണ്ട്​. വേണ്ട പരിശീലനങ്ങൾ ലഭിച്ചിട്ടുണ്ടെന്നും യുവാക്കൾ പറഞ്ഞു.