ചൈനീസ്​ പുരാവസ്​തു പ്രദർശനം റിയാദിൽ തുടങ്ങി

റിയാദ്​: അപൂർവ ചൈനീസ്​ പുരാവസ്​തുക്കളുടെ പ്രദർശനം റിയാദ്​ നാഷനൽ മ്യൂസിയത്തിൽ ആരംഭിച്ചു. സൗദിയിൽ ആദ്യമായി നടക്കുന്ന ചൈനീസ്​ പ്രദർശന മേള വ്യാഴാഴ്​ച വൈകീട്ട്​ സൗദി കമീഷൻ ഫോർ ടൂറിസം ആൻഡ്​ നാഷനൽ ഹെരിറ്റേജ്​ പ്രസിഡൻറ്​ അമീർ സുൽത്താൻ ബിൻ സൽമാനും റിയാദിലെ ചൈനീസ്​ അംബാസഡർ ലി ഹുവാക്​സിനും ചേർന്ന്​ ഉദ്​ഘാടനം ചെയ്​തു. ‘ട്ര​ഷറേഴ്​സ്​ ഒാഫ്​ ചൈന’ എന്ന ശീർഷകത്തിൽ ഏഴ്​ ആഴ്​ച നീളുന്ന മേള നവംബർ 23 വരെയാണ്​. മു​െമ്പാരിക്കലും ചൈനക്ക്​ പുറത്ത്​ പ്രദർശിപ്പിച്ചിട്ടില്ലാത്ത 200 അത്യപൂർവ പുരാവസ്​തുക്കളാണ്​ ഇൗ പ്രദർശനത്തിലുള്ളത്​. ആയിരക്കണക്കിന്​ വർഷം പഴക്കമുള്ള ചൈനീസ്​ സാംസ്​കാരിക പാരമ്പര്യത്തി​​െൻറ തിരുശേഷിപ്പുകളാണിവ. പൗരാണിക കാലം മുതലുള്ള ചൈനയുടെ സാംസ്​കാരിക വികാസവും പരിണാമവും കലാപാരമ്പര്യവും സാമൂഹിക ജീവിതത്തി​​െൻറ ശക്തി സൗന്ദര്യങ്ങളും സംബന്ധിച്ച്​ വ്യക്​തമായ വീക്ഷണം സമ്മാനിക്കും ഇൗ പ്രദ​ർശനം. ചൈനീസ്​ സംസ്​കാരവും നാഗരിക സാമൂഹിക വളര്‍ച്ചയുടെ ചരിത്രവും മനസിലാക്കാൻ സന്ദർശകന്​ ലഭിക്കുന്ന ഏറ്റവും മികച്ച അവസരമാണിതെന്നും സംഘാടകർ വാർത്താക്കുറിപ്പിൽ അറിയിച്ചു.

ചൈനീസ്​ ചരിത്രത്തി​​െൻറ നാൾവഴികളെ അഞ്ച്​ ഘട്ടങ്ങളായി തിരിച്ചാണ്​ പ്രദർശനം സംഘടിപ്പിച്ചിരിക്കുന്നത്​. നാഗരികതയുടെ തുടക്കവും ആചാരാനുഷ്​ഠാനങ്ങളുടെയും വിശദീകരിക്കുന്ന ഘട്ടമാണ്​ ആദ്യത്തേത്​. ചൈനയുടെ രാഷ്​ട്രമെന്ന നിലയിലെ ഏകീകരണം, ഉദ്‌ഗ്രഥനം, വികസനം ; വൈവിധ്യപൂർണവുമായ വിദേശ സാംസ്​കാരിക വിനിമയം; സമുദ്ര വ്യാപാരവും വാണിജ്യ വികാസവും​​; സാമ്രാജ്യത്വ ശാക്തീകരണം എന്നിവയാണ്​ മറ്റ്​ ഘട്ടങ്ങൾ. 2016 ജനുവരിയിൽ ചൈനീസ്​ പ്രസിഡൻറ്​ ഷി ചിൻപിങ്ങി​​െൻറ സൗദി സന്ദർശന വേളയിൽ ഒപ്പുവെച്ച ധാരണാപത്രത്തി​​െൻറ അടിസ്ഥാനത്തിൽ പുരാവസ്​തു മേഖലയിൽ​ സഹകരണം വിപുലീകരിക്കുന്നതി​​െൻറ ഭാഗമാണ്​ പ്രദർശനം. സൗദി അറേബ്യയും ചൈനയും സംയുക്തമായുള്ള പുരാവസ്​തു പര്യവേക്ഷണങ്ങൾക്കും അനുബന്ധ പ്രവർത്തനങ്ങൾക്കും ശക്തിപകരുന്നതുമാണ്​ ഇൗ മേള.