അപൂർവ ചൈനീസ്​ പുരാവസ്​തുക്കൾ സൗദിയിലെത്തുന്നു

റിയാദ്​: അപൂർവ ചൈനീസ്​ പുരാവസ്​തുക്കൾ കാണാൻ റിയാദിൽ അവസരമൊരുങ്ങുന്നു. ആദ്യമായാണ്​ ഇത്തരത്തിലൊരു ചൈനീസ്​ പ്രദർശന മേള. റിയാദ്​ നാഷനൽ മ്യൂസിയത്തിൽ ഇൗ മാസം 12ന്​ സൗദി കമീഷൻ ഫോർ ടൂറിസം ആൻഡ്​ നാഷനൽ ഹെരിറ്റേജ്​ പ്രസിഡൻറ്​ അമീർ സുൽത്താൻ ബിൻ സൽമാനും റിയാദിലെ ചൈനീസ്​ അംബാസഡർ ലി ഹുവാക്​സിനും ചേർന്ന്​ പ്രദർശനം ഉദ്​ഘാടനം ചെയ്യും. ‘ട്ര​​േഷഴ്​സ്​ ഒാഫ്​ ചൈന’ എന്ന ശീർഷകത്തിൽ ഏഴ്​ ആഴ്​ച നീളുന്ന മേള നവംബർ 23^ന്​ അവസാനിക്കും. ചൈനയിലെ 13 മ്യൂസിയങ്ങളിൽ നിന്നുള്ള 264 അത്യപൂർവ പൗരാണിക ശേഷിപ്പുകൾ റിയാദിലെത്തും. സൗദി അറേബ്യയും ചൈനയും സംയുക്തമായി നടത്തുന്ന പുരാവസ്​തു ഖനനങ്ങളിലൂടെ ലഭിച്ച വസ്​തുക്കളും ഇതോടൊപ്പം പ്രദർശിപ്പിക്കും. ഇവയും ഇതാദ്യമായാണ്​ പൊതുപ്രദർശനത്തിന്​ വെക്കുന്നത്​.

2016 ജനുവരിയിൽ ചൈനീസ്​ പ്രസിഡൻറ്​ ഷി ചിൻപിങ്ങി​​െൻറ സൗദി സന്ദർശന വേളയിൽ ഒപ്പുവെച്ച ധാരണാപത്രത്തി​​െൻറ അടിസ്ഥാനത്തിൽ പുരാവസ്​തു മേഖലയിൽ​ സഹകരണം വിപുലീകരിക്കുന്നതി​​െൻറ ഭാഗമാണ്​ പ്രദർശന മേള. സർക്കാർ സ്ഥാപനമായ ‘ആർട്​ എക്​സിബിഷൻസ്​ ചൈന’യാണ്​ മേള ഒരുക്കുന്നത്​. പ്രശസ്​തമായ ബീജിങ്ങിലെ പാലസ്​ മ്യൂസിയം, സിയാനിലെ ഷാൻങ്​സി ഹിസ്​റ്ററി മ്യൂസിയം, ഹെനാൻ പ്രവിശ്യയിലെ ലുയോങ്​ മ്യൂസിയം എന്നിവ ഉൾപ്പെടെ 13 മ്യൂസിയങ്ങളാണ്​ സ്വന്തം​ പ്രദർശനവസ്​തുക്കളുമായി മേളയിലെത്തുക.

ആഗോള ശ്രദ്ധ നേടിയ ചൈനീസ്​ പൗരാണിക ശേഷിപ്പുകളിൽ ഏറെയും​ പ്രദർശനത്തിൽ അണിനിരത്തും. മനുഷ്യ​​​െൻറ കരകൗശല ചാതുരിയുടെ ഏറ്റവും പരാണിക തെളിവായി കണ്ടെടുക്കപ്പെട്ടിട്ടുള്ള കളിമൺപാത്രമാണ്​ ഇതിൽ പ്രധാനം. പാർശ്വങ്ങളിൽ മനുഷ്യ മുഖത്തി​​െൻറയും മത്സ്യത്തി​​െൻറയും ചിത്രങ്ങൾ കോറിയിട്ടുള്ള പാത്രം​ ബി.സി 3,000 വർഷം പഴക്കമുള്ളതാണ്​​.

രണ്ട്​ മീറ്റർ ഉയരമുള്ള ഒരു സൈന്യാധിപ​​െൻറ പ്രതിമയാണ്​ മ​റ്റൊന്ന്​. ഏകീകൃത ചൈനയുടെ (ബി.സി 220) ആദ്യ ചക്രവർത്തിയായിരുന്ന ചിൻ ഷി ഹ്വാങ്​ ഡിയുടെ ഒളി സൈന്യത്തി​​െൻറ സേനാധിപ​േൻറതാണെന്ന്​ കരുതുന്ന​ പ്രതിമയാണിത്​. അറേബ്യൻ സാംസ്​കാരിക പാരമ്പര്യവുമായി ബന്ധ​മുള്ള ചൈനീസ്​ പൗരാണിക ശേഷിപ്പുകളും പ്രദർശനത്തിനെത്തും. ഇസ്​ലാമിക ലോകവും ചൈനയുമായി സാംസ്​കാരിക വിനിമയം നടന്നിരുന്ന പൗരാണികമായ ‘പട്ട്​ പാത’യുടെ ശേഷിപ്പുകളാണ്​ ഇവയിൽ പ്രധാനപ്പെട്ടത്​. ഇസ്​ലാമിക സംസ്​കാരം ആദ്യകാലത്ത്​ തന്നെ ചൈനയിൽ സ്വാധീനം ചെലുത്തിയിരുന്നതി​​െൻറ തെളിവുകളും ഇവയിൽ ഉൾപ്പെടും. ഒട്ടകത്തി​​െൻറ ചിത്രങ്ങളും അറബിക്​ ലിപിയും കൊത്തിയിട്ടുള്ള കളിമൺ നിർമിതികളും സൈയ്​തോൻ (ഫ്യുജിയൻ പ്രവിശ്യയിലെ ഖുവാൻസോ) മേഖലയിൽ നിന്ന്​ കണ്ടെടുത്ത ഇസ്​ലാമിക സ്മാരകശിലകളും ഇക്കൂട്ടത്തിലുണ്ട്​.