സുരക്ഷാ ഭീഷണി: ഹൂതികളുടെ രണ്ട് ബോട്ടുകൾ സഖ്യസേന തകർത്തു

റിയാദ്: അന്താരാഷ്​ട്ര കപ്പൽ സഞ്ചാരത്തിന് ഭീഷണി സൃഷ്‌ടിച്ച യമൻ വിമതരായ ഹൂതികളുടെ രണ്ട് ബോട്ടുകൾ ചെങ്കടലിൽ സൗദി സഖ്യസേന തകർത്തതായി വക്താവ്​ കേണൽ തുർക്കി അൽമാലികി അറിയിച്ചു. ആയുധങ്ങൾ നിറച്ച ബോട്ടുകൾ യമനിലെ സലീഫ് തുറമുഖത്തിന് ആറ് കിലോമീറ്റർ അകലെ വെച്ചാണ് തകർത്തത്. മേഖലയിലെ സമാധാനവും അന്താരാഷ്​ട്ര കപ്പൽ ചാലി​​െൻറ സുരക്ഷിതത്വവും തകർക്കാൻ ശ്രമിക്കുന്നു എന്ന്​ ക​െണ്ടത്തിയതിനെ തുടർന്നാണ്​ വ്യാഴാഴ്ച പുലർച്ചെ 3.20ന് സഖ്യസേന ഈ ദൗത്യം വിജയകരമായി പൂർത്തീകരിച്ചതെന്ന്​ അൽമാലികി വിശദീകരിച്ചു.

സലീഫ് തുറമുഖത്തുനിന്ന് ആറ് കിലോമീറ്ററും കരയിൽ നിന്ന് 215 മീറ്ററും അകലെയാണ്​ ആയുധങ്ങൾ നിറച്ച ബോട്ടുകളുണ്ടായിരുന്നത്​. തൊട്ടടുത്തുള്ള ഹുദൈദ തുറമുഖത്തിനും ചെങ്കടലിലെ ബാബുൽ മൻദബ് കടലിടുക്കിലൂടെയുള്ള സഞ്ചാരത്തിനും ബോട്ടുകളുടെ നീക്കം ഭീഷണി സൃഷ്​ടിച്ചിരുന്നു. അന്താരാഷ്​ട്ര നിയമങ്ങൾ അനുസരിച്ചാണ് സഖ്യസേനയുടെ ഇടപെടലും നടപടിയും ഉണ്ടായതെന്നും സഖ്യസേന വക്താവ് വ്യക്തമാക്കി.

ഹുദൈദ തുറമുഖം ഹൂതികൾ ബാലിസ്​റ്റിക് മിസൈലുകളും ഡ്രോണുകളും വിക്ഷേപിക്കാനുള്ള കേന്ദ്രമായി ഉപയോഗിക്കുന്നുണ്ടെന്നും തുർക്കി അൽമാലികി പറഞ്ഞു. യമനിലെ ഭരണ അട്ടിമറി അവസാനിപ്പിച്ച് സമാധാനം ഉറപ്പുവരുത്തുന്നത് വരെ സഖ്യസേനയുടെ ദൗത്യം തുടരുമെന്നും അദ്ദേഹം കൂട്ടിച്ചേർത്തു.