സൗദി ദേശീയ ദിനം: വെടിക്കെട്ടും ഡ്രോൺ ഷോകളും മാറ്റിവെച്ചു

റിയാദ്: സൗദി അറേബ്യയുടെ ദേശീയ ദിനാഘോഷങ്ങളുടെ ഭാഗമായി രാജ്യത്തിന്റെ വിവിധ ഭാഗങ്ങളിൽ സംഘടിപ്പിക്കാനിരുന്ന വെടിക്കെട്ടും ഡ്രോൺ ഷോകളും മാറ്റിവെച്ചതായി അധികൃതർ അറിയിച്ചു.

ജനറൽ എന്റർടൈൻമെന്റ് അതോറിറ്റിക്ക് കീഴിലുള്ള ഔദ്യോഗിക വിനോദ പരിപാടികളുടെ പ്ലാറ്റ്‌ഫോമായ "ഈഷാ" ആണ് വിവരങ്ങൾ പുറത്തുവിട്ടത്. മുൻകൂട്ടി നിശ്ചയിച്ചിരുന്ന കരിമരുന്ന് പ്രയോഗത്തിന്റെയും ഡ്രോൺ പ്രദർശനങ്ങളുടെയും പുതിയ തീയതി പിന്നീട് പ്രഖ്യാപിക്കുമെന്ന് അധികൃതർ വ്യക്തമാക്കി.

സൗദി അറേബ്യയുടെ 96-ാമത് ദേശീയ ദിനാഘോഷങ്ങളുടെ സംഘാടനത്തിന്റെ ഭാഗമായാണ് ഈ മാറ്റം. സ്ഥാപകനായ അബ്ദുൽ അസീസ് ബിൻ അബ്ദുൽ റഹ്മാൻ അൽ സൗദ് രാജാവിന്റെ നേതൃത്വത്തിൽ 1932 സെപ്റ്റംബർ 23-നാണ് സൗദി അറേബ്യ ഏകീകൃത രാജ്യമായി പ്രഖ്യാപിക്കപ്പെട്ടത്.

വർഷം തോറും രാജ്യത്തിന്റെ വികസന, സാംസ്കാരിക, സാമ്പത്തിക നേട്ടങ്ങളെ അനുസ്മരിച്ചുകൊണ്ട് വൻതോതിലുള്ള വിനോദ-സാംസ്കാരിക പരിപാടികളാണ് സംഘടിപ്പിക്കാറുള്ളത്. പുതിയ തീയതിയും സമയക്രമവും ജനറൽ എന്റർടൈൻമെന്റ് അതോറിറ്റി ഉടൻ തന്നെ ഔദ്യോഗിക മാധ്യമങ്ങളിലൂടെ അറിയിക്കും.