രാജ്യത്തിനെതിരെ ഗൂഡാലോചന:  സൗദിയിൽ അറസ്​റ്റിലായത്​ 17 പേർ 

ജിദ്ദ: രാജ്യത്തിനെതിരെ ഗൂഡാലോചന നടത്തിയെന്ന കുറ്റത്തിന്​ സൗദി അറേബ്യയിൽ പിടിയിലായത്​ ഒമ്പതുവനിതകൾ ഉൾപ്പെടെ 17 പേരാണെന്ന്​ പബ്ലിക്​ പ്രോസിക്യൂട്ടറുടെ ഒാഫീസ്​ അറിയിച്ചു. ഇവരെ ചോദ്യം ചെയ്​തുവരികയാണ്​. ഇതിൽ അഞ്ച്​ വനിതകളെയും മൂന്നുപുരുഷൻമാരെയും അന്വേഷണം പൂർത്തിയാകുന്നതുവരെ താൽകാലികമായി ജാമ്യത്തിൽ വിട്ടു. അഞ്ചുപുരുഷൻമാരും നാലു വനിതകളും കസ്​റ്റഡിയിൽ തുടരുകയാണ്​.

കൃത്യമായ തെളിവുകളുടെയും കുറ്റസമ്മത മൊഴികളുടെയും അടിസ്​ഥാനത്തിലാണ്​ ഇവർക്കെതിരെ നടപടി സ്വീകരിച്ചതെന്നും അധികൃതർ വിശദീകരിച്ചു. രാജ്യത്തി​​​െൻറ ശത്രുക്കളുമായി ബന്ധം പുലർത്തിയിരുന്നതായും സഹകരിച്ചിരുന്നതായും പലരും സമ്മതിച്ചിട്ടുണ്ട്​. തന്ത്രപ്രധാന സർക്കാർ സ്​ഥാനങ്ങളിൽ ആളുകളെ റിക്രൂട്ട്​ ചെയ്യാനും ഇവർ ശ്രമിച്ചിരുന്നു. ദേ​ശസുരക്ഷക്ക്​ ഭീഷണിയാകുന്ന തരത്തിലായിരുന്നു ഇവരുടെ പ്രവർത്തനങ്ങൾ. മുൻവിധിയില്ലാത്ത അന്വേഷണമാകും നടത്തുകയെന്നും പിടിയിലായവരുടെ അന്തസും അവകാശങ്ങളും മാനിക്കപ്പെടുമെന്നും പബ്ലിക്​ പ്രോസിക്യൂഷൻ പ്രസ്​താവനയിൽ വ്യക്​തമാക്കി. കുടുംബാംഗങ്ങളുമായി ബന്ധപ്പെടാൻ അവസരവും കൃത്യമായ താമസ സംവിധാനങ്ങളും ഇവർക്കായി ഒരുക്കിയിട്ടുമുണ്ട്​.