സൗദിയിൽ 34 ശതകോടി ചെലവിൽ ‘ജീവിത നിലവാര പദ്ധതി 2020’ പ്രാബല്യത്തിൽ

ജിദ്ദ: സൗദി അറേബ്യയിലെ ജനങ്ങളുടെ ജീവിതം നിലവാരം ഉയർത്തുന്നതിനുള്ള പ്രത്യേക പദ്ധതിക്ക്​ തുടക്കം കുറിച്ചു. 34.6 ശതകോടി ഡോളർ ​(130 ശതകോടി റിയാൽ) ചെലവിലുള്ള ‘ജീവിത നിലവാര പദ്ധതി 2020’ ന്​ സാമ്പത്തിക, വികസനകാര്യ കൗൺസിൽ അംഗീകാരം നൽകി. വിഷൻ 2030 ​​​​െൻറ പ്രധാന ലക്ഷ്യങ്ങളിൽ പെട്ട പദ്ധതിക്ക്​​ മന്ത്രിസഭ നേരത്തെ അനുമതി നൽകിയിരുന്നു. വ്യക്​തികളുടെയും കുടുംബങ്ങളുടെയും ജീവിതശൈലിയും നിലവാരവും മെച്ചപ്പെടുത്തുകയും രാജ്യത്തെ വാസ അന്തരീക്ഷം മികവുറ്റതാക്കുകയും ചെയ്യണമെന്ന സൽമാൻ രാജാവി​​​​െൻറയും കിരീടാവകാശി അമീർ മുഹമ്മദ്​ ബിൻ സൽമാ​​​​െൻറയും കാഴ​്​ചപ്പാടിന്​ അടിസ്​ഥാനത്തിലാണ്​ പദ്ധതി വിഭാവനം ചെയ്​തിരിക്കുന്നത്​. 

ഇതിനൊപ്പം സാംസ്​കാരിക, വിനോദ, കായിക പ്രവർത്തനങ്ങളിൽ പൊതുജന സഹകരണവും സാന്നിധ്യവും ഉറപ്പുവരുത്തും. ജീവിത നിലവാര തോത്​ ഉയർത്തുക, തൊഴിൽ അവസരങ്ങൾ വർധിപ്പിക്കുക, നിക്ഷേപ സൗഹൃദ അന്തരീക്ഷം സൃഷ്​ടിക്കുക, സാമ്പത്തിക വ്യവഹാര മേഖല വിസ്​തൃതമാക്കുക എന്നിവയും പദ്ധതിയുടെ വിശാല ലക്ഷ്യങ്ങളിൽ പെടുന്നു. ഒപ്പം സൗദി നഗരങ്ങളെ ലോകോത്തര നിലവാരത്തിലേക്ക്​ പരിവർത്തനപ്പെടുത്തുകയെന്നതും വിപ്ലവകരമായ ഇൗ പദ്ധതിയുടെ ഭാഗമാണ്​. 

പദ്ധതിക്കായി 2020 വരെ ചെലവഴിക്കാൻ മാറ്റിവെച്ചിരിക്കുന്ന 130 ശതകോടി റിയാലിൽ 74.5 ശതകോടിയും പദ്ധതിയിലേക്കുള്ള നേരിട്ടുള്ള നിക്ഷേപമായിരിക്കും. 13.3 ശതകോടി റിയാൽ സർക്കാരി​​​​െൻറ മൂലധന ചെലവ്​. സ്വകാര്യ മേഖലയിലെ നിക്ഷേപത്തിന്​ 23.7 ശതകോടി. ഇൗ കാലയളവിനുള്ളിൽ 220 വ്യത്യസ്​ത സംരംഭങ്ങൾക്കാകും തുടക്കം കുറിക്കുക. 

നിലവിൽ പ്രഖ്യാപിച്ചതും പ്രവർത്തനം തുടങ്ങിയതുമായ റിയാദിലെ അൽഖിദ്ദിയ്യ, ചെങ്കടൽ പദ്ധതി, ദറഇയ്യ ഗേറ്റ്​, ഹിസ്​റ്റോറിക്കൽ ജിദ്ദ, അൽഉല റോയൽ കമീഷൻ തുടങ്ങിയ പദ്ധതികൾക്ക്​ പുറമേയുള്ളതാകും പുതിയ സംരംഭങ്ങൾ. 2020 ഒാടെ മൊത്തം 3,46,000 തൊഴിൽ അവസരങ്ങളും എണ്ണഇതര വരുമാനത്തിൽ 1.9 ശതകോടി റിയാലി​​​​െൻറ അധികവരുമാനവും സൃഷ്​ടിക്കപ്പെടുമെന്നും പ്രതീക്ഷിക്കുന്നു. 12 വർഷത്തിനുള്ളിൽ ലോകത്തെ 100 മികച്ച നഗരങ്ങളുടെ പട്ടികയിൽ കുറഞ്ഞത്​ മൂന്ന്​ സൗദി നഗരങ്ങളെങ്കിലും ഉണ്ടാകണമെന്ന വിശാല ലക്ഷ്യവും ഇതിന്​ പിന്നിലുണ്ട്​. സുസ്​ഥിര വികസന പദ്ധതി മാതൃകകളിൽ സാമ്പത്തിക, നിക്ഷേപ അവസരങ്ങളും സൃഷ്​ടിക്കും. സ്വകാര്യമേഖല നിക്ഷേപങ്ങൾക്കായി ചില ഫണ്ടിങ്​ മാതൃകകൾ വികസിപ്പിക്കും. ജീവിത നിലവാരം വർധിപ്പിക്കുന്നതിനുള്ള പദ്ധതികളിൽ വിദേശനിക്ഷേപകരെ ആകർഷിക്കുകയും ചെയ്യും.