സൗദി സന്ദർശകവിസ ഫീസിൽ വൻ ഇളവ്​ പ്രാബല്യത്തിൽ 

റിയാദ്​: സൗദി അറേബ്യയിലേക്ക്​ സന്ദര്‍ശക വിസ ഫീസിൽ വൻഇളവ്​ പ്രാബല്യത്തിലായി. കഴിഞ്ഞ വർഷം വർധിപ്പിച്ച ഫീസാണ്​ കുത്തനെ കുറച്ചത്​. നിലവിലുണ്ടായിരുന്ന  2000 റിയാലിന് പകരം 305 റിയാലാണ് പുതിയ വിസ സ്​റ്റാമ്പിങ് ചാര്‍ജായി ബുധനാഴ്​ച മുതൽ ഇൗടാക്കിയതെന്ന്​ ട്രാവൽ ഏജൻസികൾ സ്​ഥിരീകരിച്ചു. ഇത് സംബന്ധിച്ച സര്‍ക്കുലര്‍ ലഭിച്ചതായും  പുതിയ തുക ഈടാക്കുമെന്നും വിവിധ ഏജന്‍സികള്‍ കഴിഞ്ഞ ദിവസം അറിയിച്ചിരുന്നു. എന്നാൽ  സൗദി അധികൃതർ ഇതു സംബന്ധിച്ച വിവിരങ്ങളൊന്നും പുറത്തുവിട്ടിട്ടില്ല. പുതിയ ഫീസ്​​ പ്രകാരം സിംഗിൾ വിസിറ്റ്​ വിസക്ക്​ 7500 രൂപയും ആറ്​ മാസത്തേക്കുള്ള മൾട്ടിപ്പിൾ വിസിറ്റ്​ വിസക്ക്​ 10,800 രൂപയും ഒരു വർഷത്തേക്കുള്ള മൾട്ടിപ്പിൾ  വിസിറ്റ്​ വിസക്ക്​ 17900 രൂപയും രണ്ട്​ വർഷത്തേക്കുള്ള മൾട്ടിപ്പിൾ വിസിറ്റ്​ വിസക്ക്​ 25,500 രൂപയും മതി. നേരത്തെ മൂന്ന്​ മാസത്തേക്ക്​ സിംഗിൾ വിസിറ്റ്​ വിസക്ക്​ 40,000 രൂപയോളം ഫീസിനത്തിൽ മാ​​​ത്രം ചെലവ്​ വരുമായിരുന്നു. 

2016 ഒക്ടോബറിലാണ് സൗദിയിലേക്ക്​ സന്ദര്‍ശക വിസ ഫീസ്​ കൂട്ടിയത്. മൂന്നുമാസത്തേക്കുള്ള സിംഗിള്‍ എന്‍ട്രി സന്ദര്‍ശക വിസക്ക് അന്നുമുതല്‍ 2000 റിയാലായിരുന്നു ഫീസ്​. ട്രാവല്‍ ഏജൻറുമാര്‍ക്ക് ലഭിച്ച അറിയിപ്പ്​ അനുസരിച്ച് ഇനി മുതല്‍ 300-350 റിയാലാകും ഇതിനുള്ള ഫീസ്​. കേരളത്തില്‍ സൗദിയിലേക്ക് മൂന്ന് മാസത്തേക്ക് ഫാമിലി വിസ സ്​റ്റാമ്പിങ്ങിന്​ ഇന്‍ഷൂറന്‍സും ജി.എസ്​.ടിയുമടക്കം 45,000 രൂപ വരെയാണ് ഈടാക്കിയത്. ഈ തുകയാണ് ഒറ്റയടിക്ക് 10,000 രൂപയിലേക്കെത്തുന്നത്. ഇതു സംബന്ധിച്ച സര്‍ക്കുലര്‍ മുബൈയിലെ കോണ്‍സുലേറ്റില്‍ നിന്ന്​ ലഭിച്ചതായി ട്രാവല്‍ ഏജൻറുമാർ അറിയിച്ചു. ആറ്​ മാസ മള്‍ട്ടിപ്പിള്‍ എന്‍ട്രി വിസക്ക് നിലവില്‍ 3,000 റിയാലാണ്. ഇത് 450 റിയാലാകുമെന്നും ട്രാവല്‍ ഏജൻറുമാര്‍ വിശദീകരിക്കുന്നു. വിസ നിരക്ക് കുടിയതോടെ  2016 നെ അപേക്ഷിച്ച് 20 ശതമാനം മാത്രമായിരുന്നു വിസ സ്​റ്റാമ്പിങ് നടന്നിരുന്നത്​. 

വിസിറ്റിങ്​ വിസക്ക്​ ചെലവ്​ കുത്തനെ കുറഞ്ഞതോടെ സൗദിയിൽ സന്ദർശകരുടെ എണ്ണത്തിൽ  വലിയ മാറ്റമുണ്ടാകുമെന്നാണ്​ പ്രതീക്ഷിക്കുന്നത്​. സന്ദർശക വിസയിൽ വരുന്നവർക്ക്​ ആശ്രിതലെവി വേണ്ട എന്നതിനാൽ പ്രവാസികൾ കുടുംബത്തെ സന്ദർശക വിസയിൽ കൊണ്ടുവരാൻ സാധ്യത ഏറെയാണ്​. ഇത്​ വ്യാപാര മേഖലയിലും വലിയ ഉണർവ്​ ഉണ്ടാക്കുമെന്നാണ്​ വിലയിരുത്തൽ. കനത്ത ആശ്രിതലെവി അടക്കേണ്ടതിനാൽ സൗദിയിൽ കുടുംബത്തോടെ താമസിച്ച പ്രവാസികൾ കൂട്ടത്തോടെ നാടണയാൻ തുടങ്ങിയിരുന്നു. ഇത്​ റിയൽ എസ്​റ്റേറ്റ്​ മേഖലയിലും വ്യാപാര മേഖലയിലും വലിയ മാന്ദ്യം സൃഷ്​ടിച്ചിരുന്നു. ഇതിൽ വലിയ മാറ്റമാണ്​ പുതിയ ഫീസ്​ നിരക്ക്​ കൊണ്ടുവരിക എന്നാണ്​ പ്രതീക്ഷ.