അഴിമതി വിരുദ്ധ നടപടി;  സമാഹരിച്ചത്​ 107 ശതകോടി ഡോളർ

റിയാദ്​: സൗദി അറേബ്യയിലെ അഴിമതി വിരുദ്ധ നടപടിയുടെ ഭാഗമായി പിടിയിലായ 381 ​പ്രമുഖരിൽ 56 പേർ ഇപ്പോഴും കസ്​റ്റഡിയിൽ തുടരുന്നുവെന്ന്​ അറ്റോർണി ജനറൽ. അന്വേഷണം അവസാനഘട്ടത്തിലാണ്​. നിരപരാധികളെന്ന്​ കണ്ടെത്തിയ എല്ലാവരെയും മോചിപ്പിക്കാൻ തീരുമാനമായിട്ടുണ്ട്​. കുറ്റം സമ്മതിച്ച്​ സർക്കാരുമായി ഒത്തുതീർപ്പിന്​ സന്നദ്ധരായവരെയും മോചിപ്പിക്കും. വിവിധ വ്യക്​തികളുമായുള്ള ഒത്തുതീർപ്പി​​​െൻറ ആകെ മൂല്യം 107 ശതകോടി ഡോളറാണെന്നും അറ്റോർണി ജനറൽ ശൈഖ്​ സൗദ്​ അൽമുജീബ്​ വ്യക്​തമാക്കി. 

റിയൽ എസ്​റ്റേറ്റ്​, കമ്പനികൾ, ഒാഹരികൾ, പണം തുടങ്ങിയ ആസ്​തികളും​ ഒത്തുതീർപ്പി​​​െൻറ ഭാഗമാണ്​​. അഴിമതി വിരുദ്ധ നടപടിയുടെ ഭാഗമായി കഴിഞ്ഞവർഷം നവംബർ നാലിനാണ്​ രാജകുടുംബാംഗങ്ങളും മ​ന്ത്രിമാരും ഉൾപ്പെടെ പ്രമുഖരെ റിയാദിലെ റിറ്റ്​സ്​ കാൾട്ടൺ ഹോട്ടലിൽ തടവിലാക്കിയത്​. മൂന്നുമാസത്തോളമായി തുടരുന്ന അന്വേഷണത്തിനിടെ ഒത്തുതീർപ്പിന്​ സന്നദ്ധരായവരെയും നിരപരാധികളെന്ന്​ തെളിഞ്ഞവരെയും ഘട്ടംഘട്ടമായി മോചിപ്പിച്ചിരുന്നു. സൗദി ശതകോടീശ്വരനും കിങ്​ഡം ഹോൾഡിങ്​സ്​ ഉടമയുമായ അമീർ വലീദ്​ ബിൻ തലാലും കഴിഞ്ഞദിവസം മോചിതനായി. 

അതിനിടെ, തടവിലുള്ള എല്ലാവരും മോചിതരായെന്ന നിലയിൽ ചൊവ്വാഴ്​ച രാവിലെയോടെ വാർത്ത ഏജൻസിയെ ഉദ്ധരിച്ച്​ പ്രാദേശിക മാധ്യമങ്ങൾ റിപ്പോർട്ട്​ ചെയ്​തു. പക്ഷേ, റിറ്റ്​സ്​ കാൾട്ടൺ ഹോട്ടലിൽ ഇനിയാരും ശേഷിക്കുന്നില്ലെന്നാണ്​ ബന്ധപ്പെട്ട വൃത്തങ്ങൾ പറഞ്ഞതെന്ന്​ പിന്നീട്​ വ്യക്​തമായി. തടവിൽ ബാക്കിയുള്ളവർ ജയിലുകളിലും മറ്റുകേന്ദ്രങ്ങളിലുമാണുള്ളത്​. മൂന്നുമാസമായി തടവുകേന്ദ്രമായി തുടരുന്ന റിയാദിലെ പ്രമുഖ നക്ഷത്ര ഹോട്ടലായ റിറ്റ്​സ്​ കാൾട്ടൺ ഫെബ്രുവരി 14 ഒാടെ തുറന്നുപ്രവർത്തിക്കുമെന്ന്​ നേരത്തെ അറിയിപ്പുണ്ടായിരുന്നു. മൊത്തം 492 മുറികൾ ഉള്ള ഹോട്ടൽ, നഗരമധ്യത്തിൽ 52 ഏക്കറിലാണ്​ സ്​ഥിതി ചെയ്യുന്നത്​. 650 ഡോളറാണ് ഒരുമുറിയുടെ ഏറ്റവും കുറഞ്ഞ ദിവസവാടക​.