ആദ്യവാരം പിന്നിട്ട്​ ആശ്രിത ലെവി;  ഇനിയില്ല അവ്യക്​തതകൾ

ജിദ്ദ: ആശ്രിതലെവി നടപ്പിലായി ഒരാഴ്​ച പിന്നിടു​േമ്പാൾ  ഇതു സംബന്ധിച്ച്​ സൗദിയിലെ പ്രവാസികളുടെ സംശയങ്ങൾ ഒരുവിധം നീങ്ങി. 
ജൂലൈ ഒന്നു മുതൽ ലെവി നടപ്പിലാവുമെന്ന്​  സർക്കാർ നേരത്തെ പ്രഖ്യാപിച്ചിരുന്നെങ്കിലും തീരുമാനം മാറുമെന്ന്​ വിശ്വസിച്ച്​ കാത്തിരുന്നവരേറെയായിരുന്നു. ഇതു സംബന്ധിച്ച്​ സാമൂഹികമാധ്യമങ്ങളിൽ പ്രചരിച്ച അവാസ്​തവങ്ങളിൽ വിശ്വസിച്ച്​ ആശ്വാസം കൊള്ളുകയായിരുന്നു പലരും. 
എന്നാൽ ജൂലൈ ഒന്ന്​ മുതൽ തന്നെ ലെവി പ്രാബല്യത്തിൽ വന്നതോടെ ഇത്​ വരുമോ ഇല്ലയോ എന്ന സംശയംഇ എല്ലാവർക്കും മാറി. ഒരാഴ്​ചക്കകം പാസ്​പോർട്ട്​ വിഭാഗവും മറ്റ്​ സർക്കാർ വകുപ്പുകളും ഇതു സംബന്ധിച്ച കൂടുതൽ വിശദീകരണങ്ങൾ നൽകുകയും ചെയ്​തു. ഇനിയും പല തരം പ്രതീക്ഷകൾ പുലർത്തുന്നവരുണ്ട്​. സർക്കാർ തീരുമാനത്തിൽ അയവു വരുത്തും, ലെവിയുടെ നിരക്കിൽ കുറവു വരുത്തും തുടങ്ങി പലതരം ചർച്ചകൾ ഇപ്പോഴും പ്രവാസികൾക്കിടയിൽ കൊഴുക്കുകയാണ്​.
അതിനിടെ തീരുമാനം അറിയുന്നതിന്​ അവസാന നിമിഷം വരെ കാത്തിരുന്ന പല കുടുംബങ്ങളും ജൂലൈ ഒന്നിന്​ ശേഷം ‘പെട്ടികെട്ടി’ത്തുടങ്ങിയിട്ടുണ്ട്​. 
ആദ്യവർഷം 100 റിയാൽ വീതം 1200റിയാൽ അടച്ച്​ ഒരു വർഷം കൂടി ഇവിടെതന്നെ പിടിച്ചു നിൽക്കാം എന്ന്​ തീരുമാനമെടുക്കുന്നുവരുമുണ്ട്​. 
മറ്റ്​ ജി.സി.സികളെ അപേക്ഷിച്ച്​ കുറഞ്ഞ ചെലവിൽ സാമാന്യം നല്ല രീതിയിൽ ജീവിക്കാമെന്നതായിരുന്നു സൗദിയിലെ പ്രവാസികളെ ഇവിടെ കുടുംബസമ്മേതം ജീവിക്കാൻ പ്രേരിപ്പിച്ചത്​. 2020 ആവു​​േമ്പാഴേക്കും ആശ്രിതനൊന്നിന്​ 400 റിയാൽ പ്രതിമാസം വേണ്ടി വരുമെന്നാണ്​ കണക്ക്​. 
വർഷത്തിൽ ഒരാൾക്ക്​ 4800 റിയാൽ വേണ്ടി വരും. 2018 ജൂലൈ മുതൽ ലെവി 2400 ആവും. 2019^ൽ ഇത്​ 3600 റിയാൽ വരും. നിലവിലെ സാഹചര്യത്തിൽ ഇൗ തുക അടക്കാൻ കഴിയില്ലെന്ന ഉറച്ച കണക്കകൂട്ടലിലാണ്​ പലരും നാട്​ പിടിച്ചു തുടങ്ങിയത്​. 
അതിനനുസരിച്ച്​ വീട്ടുവാടക കുറഞ്ഞുതുടങ്ങിയിട്ടുണ്ട്​.സ്​കൂളുകളിൽ കുട്ടികളുടെ എണ്ണം കുറയാൻ തുടങ്ങിയതായി മാനേജ്​മ​​െൻറുകൾ പറഞ്ഞു.

റീഎൻട്രിക്ക്​ ലെവി 
റീഎൻട്രി അടിക്കാൻ ലെവി കെ​േട്ടണ്ടി വരുമെന്ന്​ ആരും പ്രതീക്ഷിച്ചിരുന്നില്ല. ഇഖാമ പുതു​ക്കു​േമ്പാൾ അടച്ചാൽ മതിയല്ലോ എന്നായിരുന്നു പലരും കണക്കു കൂട്ടിയത്​. എന്നാൽ ജൂലൈ ഒന്നിന്​ റി എൻട്രി അടിക്കാൻ അപേക്ഷ നൽകിയവർക്ക്​ അക്കാര്യത്തിൽ വ്യക്​തത വന്നു. വേനലവധിക്ക്​ നാട്ടിൽ പോകാൻ ഒരുങ്ങിയവരിൽ നിന്ന്​ ജൂലൈ ഒന്നു മുതൽ തന്നെ ലെവി ഇൗടാക്കിയ ശേഷമാണ്​  റി എൻട്രി വിസ അനുവദിച്ചത്​. ലെവിയിൽ നിന്നൊഴിവാകാൻ  ഇഖാമ നേരത്തെ പുതുക്കിയവർക്ക്​ ആ ആശയക്കുഴപ്പവും മാറി. അതുകൊണ്ടൊന്നും കാര്യമില്ല. ഇഖാമ മുൻകുട്ടി പുതുക്കിയവരും ലെവി അടക്കാൻ ബാധ്യസ്​ഥരാണ്​.

ഗവ. ജീവനക്കാർക്കും വിദ്യാർഥി വിസയിലുള്ളവർക്കും ഇളവ്​
പാസ്​പോർട്ട്​ വിഭാഗം അറിയിച്ചത്​ പ്രകാരം ഗവൺമ​​െൻറ്​ ജീവനക്കാരായ വിദേശികൾക്ക്​ ആശ്രിതലെവി വേണ്ട.
 സ്വകാര്യമേഖലയിൽ ജോലി ചെയ്യുന്ന വിദേശികളുടെ ആശ്രിതർക്കാണ്​ ലെവി. വിദ്യാർഥി വിസയിൽ സൗദി അറേബ്യയിലെത്തി പഠനം തുടരുന്നവർക്കും ലെവി അടക്കേണ്ടതില്ല. അതിലും നിബന്ധനകളുണ്ട്​. വിദേശികളുമായുള്ള വിവാഹബന്ധത്തിൽ സൗദി വനിതകൾക്ക്​ ജനച്ച സൗദിപൗരത്വം ലഭിക്കാത്ത മക്കൾ, സൗദി പൗരൻമാരുടെ വിദേശികളായ ഭാര്യമാർ^വിധവകൾ, വിവാഹമോചിതർ, റീ എൻട്രി വിസയിൽ സ്വദേശങ്ങളിലേക്ക്​ പോയ ശേഷം തിരിച്ചെത്താത്ത ആശ്രിതർ, സ്​ഥിരം ഇഖാമയുള്ള (ഇഖാമ ഫീസ്​ അടക്കേണ്ടാത്ത) മറ്റു വിഭാഗക്കാർ എന്നിവർക്കും ലെവി വേണ്ട.