സൗദി നിര്‍മിത ഉപഗ്രഹങ്ങള്‍ വിജയകരമായി വിക്ഷേപിച്ചു

റിയാദ്: സൗദി തലസ്ഥാനത്തെ കിങ് അബ്​ദുല്‍ അസീസ് സിറ്റി ഫോര്‍ സയന്‍സ് ആൻറ്​ ടെക്നോളജി (കാസ്​റ്റ്​) നിര്‍മിച്ച രണ്ട് ഉപഗ്രഹങ്ങള്‍ വെള്ളിയാഴ്ച വിജയകരമായി വിക്ഷേപിച്ചു. മുന്‍ നിശ്ചയപ്രകാരം രാവിലെ ഏഴ് മണിക്ക് ദൗത്യം വിജയകരമായി പൂര്‍ത്തീകരിച്ചതായി കാസ്​റ്റ്​ അധികൃതര്‍ വിശദീകരിച്ചു. സൗദി ചാനല്‍, അല്‍ഇഖ്ബാരിയ്യ, എസ്.ബി.സി, അല്‍അറബിയ്യ എന്നീ ചാനലുകള്‍ വിക്ഷേപണത്തി​​​െൻറ തത്സമയ ദൃശ്യങ്ങള്‍ പുറത്തുവിട്ടു.
സാറ്റ് 5എ, 5ബി എന്നീ ഉപഗ്രഹങ്ങള്‍ അതി​​​െൻറ ഭ്രമണപഥത്തില്‍ എത്തിയിട്ടുണ്ടെന്നും കാസ്​റ്റിലെ എൻജിനീയര്‍മാര്‍ ചൈനയിലെ ജിയോങ്വാന്‍ വിക്ഷേപണ കേന്ദ്രത്തില്‍ ഉപഗ്രഹത്തില്‍ നിന്നുള്ള ആദ്യ സന്ദേശങ്ങള്‍ സ്വീകരിക്കാന്‍ കാത്തിരിക്കയാണെന്നും കാസ്​റ്റ്​ വൃത്തങ്ങള്‍ പറഞ്ഞു.

യൂറോപ്യന്‍ വാന നിരീക്ഷണ സംവിധാനം ഉപയോഗിച്ച് സൗദി എൻജിനീയര്‍മാരാണ് ഉപഗ്രഹങ്ങളുടെ നിര്‍മാണം പൂര്‍ത്തീകരിച്ചത്. സൗദിയുടെ നിരീക്ഷണ, വികസന മേഖലയില്‍ വന്‍കുതിപ്പ് സൃഷ്​ടിക്കാന്‍ ഉപഗ്രഹങ്ങള്‍ സഹായിക്കും. വികസിത രാജ്യങ്ങള്‍ക്ക് തുല്യമായ അതിസൂക്ഷ്മ ബഹിരാകാശ ദൃശ്യങ്ങള്‍ പകര്‍ത്താന്‍ ഉപഗ്രഹങ്ങള്‍ക്ക് സാധിക്കും. സൗദി വിഷന്‍ 2030 പദ്ധതിയുടെ ഭാഗമായാണ് ഉപഗ്രഹ നിര്‍മാണവും വിക്ഷേപണവും പൂര്‍ത്തീകരിച്ചതെന്നും അധികൃതര്‍ വ്യക്തമാക്കി.