സൗദി നാടകകലാകാരൻ മുഹമ്മദ് അൽത്വവിയാൻ അന്തരിച്ചു

റിയാദ്​: സൗദി നാടകകലാകാരനും പ്രമുഖ നടനുമായ മുഹമ്മദ് അൽത്വവിയാൻ അന്തരിച്ചു. സൗദി, ഗൾഫ് നാടകകലാരൂപത്തി​ന്‍റെ സവിശേഷതകൾ തന്‍റെ തലമുറയിലെ കലാകാരന്മാർക്കൊപ്പം രൂപപ്പെടുത്തിയ ഒരു കലാജീവിതത്തിനുശേഷം 79ാം വയസ്സിലാണ്​​ സൗദി നാടകത്തിന്‍റെ ‘ശൈഖ്​’ എന്ന അറിയപ്പെടുന്ന അൽത്വവിയാ​െൻറ വിയോഗം.

അരനൂറ്റാണ്ടിനിടയിൽ അദ്ദേഹം നാടക കലാരംഗത്ത്​ ശ്രദ്ധേയമായ മുദ്ര പതിപ്പിച്ചു. പ്രേക്ഷകരുടെ മനസ്സിൽ സ്ഥിരപ്രതിഷ്​ഠ നേടിയ കഥാപാത്രങ്ങളെ അവതരിപ്പിച്ചു സ്‌ക്രീനിൽ മറക്കാനാവാത്ത ചരിത്രം സൃഷ്​ടിച്ചു. അൽത്വവിയാന്‍റെ വിയോഗം കലാസമൂഹത്തെ ദുഃഖത്തിലാഴ്ത്തി. 1945ൽ ഖസീം പ്രവിശ്യയിലെ ബുറൈദയിലാണ്​ ജനനം. അമേരിക്കയിൽ വിദ്യാഭ്യാസം പൂർത്തിയാക്കി. ദി ഡെവിൾസ് ഗെയിം, താഷ് മാ താഷ്​ തുടങ്ങിയ നിരവധി ടെലിവിഷൻ പരമ്പരകളിൽ അൽതവിയാൻ അഭിനയിച്ചിട്ടുണ്ട്​.