യുക്രെയിൻ പ്രസിഡൻറ്​ വ്ലാദിമിർ സെലൻസ്​കി സൗദിയിലെത്തി

റിയാദ്​: യുക്രെയിൻ പ്രസിഡൻറ്​ വ്ലാദിമിർ സെലൻസ്​കി സൗദി അറേബ്യയിലെത്തി. തിങ്കളാഴ്​ച ​ൈവകുന്നേരം ജിദ്ദയിലെത്തിയ സെലൻസ്​കിയെ കിങ്​ അബ്​ദുൽ അസീസ്​ ഇൻറർനാഷനൽ എയർപ്പോർട്ടിൽ മക്ക ഡെപ്യൂട്ടി ഗവർണർ അമീർ സഊദ്​ ബിൻ മിഷാൽ ബിൻ അബ്​ദുൽ അസീസ് ഊഷ്​മളമായി വരവേറ്റു.

വാണിജ്യ മന്ത്രി ഡോ. മാജിദ്​ ബിൻ അബ്​ദുല്ല അൽ ഖസബി, മക്ക റീജ്യൻ പൊലീസ്​ ഡയറക്​ടർ ജേർ ജനറൽ സാലെഹ്​ അൽ ജാബ്രി, ജിദ്ദ ഡെപ്യൂട്ടി മേയർ എൻജി. അലി ബിൻ മുഹമ്മദ്​ അൽ ഖർനി, യുക്രെയിനിലെ സൗദി അംബാസഡർ മുഹമ്മദ്​ ബിൻ അബ്​ദുൽ അസീസ്​ അൽ ബറക, സൗദിയിലെ യുക്രെയിൻ അംബാസഡർ അനട്ടലി പെട്ര​​ങ്കോ, മക്ക റീജ്യൻ റോയൽ പ്രോ​ട്ടോക്കോൾ ഓഫീസ്​ ഡയറക്​ടർ ജനറൽ അഹമ്മദ്​ അബ്​ദുല്ല ബിൻ ദാഫർ എന്നിവരും എയർപ്പോർട്ടിൽ വരവേൽക്കാനെത്തി.

റമദാൻ പ്രമാണിച്ച്​ സൽമാൻ രാജാവ്​ കഴിഞ്ഞ ദിവസം ജിദ്ദയിലേക്ക്​ മാറിയിരുന്നു. ഹജ്ജ്​ കഴിയുന്നതുവരെ ഭരണനേതൃത്വം ഇനി അവിടെയായിരിക്കുമെന്നതിനാലാണ്​ സെലൻസ്​കി ജിദ്ദയിലെത്തിയത്​. കൂടിക്കാഴ്​ചകളും ചർച്ചകളുമെല്ലാം അവിടെയായിരിക്കും നടക്കുക.

അമേരിക്കൻ പ്രസിഡൻറ്​ ഡൊണാൾഡ്​ ട്രംപുമായി നടത്തിയ കൂടിക്കാഴ്​ച ചില അസ്വാരസ്യങ്ങളിൽ കലാശിച്ച ശേഷമുള്ള സെലൻസ്​കിയുടെ സൗദി സന്ദർശനത്തിന്​ വലിയ രാഷ്​ട്രീയ പ്രധാന്യമാണ്​ കൽപിക്കുന്നത്​. പ്രത്യേകിച്ചും ട്രംപുമായി സൗദി അറേബ്യക്ക്​ ഊഷ്​മള ബന്ധമുള്ള പശ്ചാത്തലത്തിൽ. പ്രതിസന്ധികൾക്ക്​ അയവുവരുത്താൻ സൗദി ഇടപെടൽ സഹായിച്ചേക്കുമെന്ന പ്രതീക്ഷയാണ്​ സെലൻസ്​കിയെ നയിക്കുന്നതെന്ന​ും അന്താരാഷ്​ട്ര മാധ്യമങ്ങൾ വിലയിരുത്തന്നുണ്ട്​​.