മദീനയിൽ പണ്ഡിതരെയും പൗരന്മാരെയും സ്വീകരിച്ച് സൗദി കിരീടാവകാശി; റമദാൻ ആശംസകൾ കൈമാറി

മദീന: റമദാൻ പ്രമാണിച്ച്​ സൗദി കിരീടാവകാശിയും പ്രധാനമന്ത്രിയുമായ അമീർ മുഹമ്മദ് ബിൻ സൽമാൻ മദീനയിൽ വെച്ച് മതപണ്ഡിതരെയും പൗരപ്രമുഖരെയും സ്വീകരിച്ചു. റമദാൻ മാസത്തി​െൻറ അനുഗ്രഹങ്ങൾ നേരുന്നതിനും കിരീടാവകാശിയെ അഭിവാദ്യം ചെയ്യുന്നതിനുമായി എത്തിയതായിരുന്നു വിശിഷ്​ടാതിഥികൾ.

ഖുർആൻ പാരായണത്തോടെ സ്വീകരണ പരിപാടിക്ക്​ തുടക്കമായി. തുടർന്ന് അതിഥികൾ കിരീടാവകാശിക്ക് അഭിവാദ്യങ്ങൾ അർപ്പിച്ചു. ഏവർക്കും റമദാൻ ആശംസകൾ നേർന്ന കിരീടാവകാശി, എല്ലാവരുടെയും നോമ്പും പ്രാർത്ഥനകളും സൽപ്രവൃത്തികളും സർവശക്തനായ അല്ലാഹു സ്വീകരിക്കട്ടെ എന്ന് പ്രാർത്ഥിക്കുകയും ചെയ്തു.

മദീന ഗവർണർ അമീർ സൽമാൻ ബിൻ സുൽത്താൻ ബിൻ അബ്​ദുൽ അസീസ്, അമീർ തുർക്കി ബിൻ മുഹമ്മദ് ബിൻ ഫഹദ് ബിൻ അബ്​ദുൽ അസീസ് (കാബിനറ്റ്​ റാങ്കുള്ള സഹ മന്ത്രി), അമീർ മുഹമ്മദ് ബിൻ അബ്​ദുറഹ്​മാൻ ബിൻ അബ്​ദുൽ അസീസ് (റിയാദ് ഡെപ്യൂട്ടി ഗവർണർ), അമീർ സഊദ്​ ബിൻ നഹാർ ബിൻ സഊദ്​ ബിൻ അബ്​ദുൽ അസീസ് (മദീന ഡെപ്യൂട്ടി ഗവർണർ), അമീർ ബദർ ബിൻ അബ്​ദുല്ല ബിൻ ഫർഹാൻ (സാംസ്കാരിക മന്ത്രി) എന്നിവരും മറ്റു രാജകുടുംബാംഗങ്ങളും മന്ത്രിമാരും ഉന്നത ഉദ്യോഗസ്ഥരും ചടങ്ങിൽ സന്നിഹിതരായിരുന്നു.