ജി 20 ഉച്ചകോടിയിൽ പ​ങ്കെടുക്കാൻ സൗദി കിരീടാവകാശി ഇന്തോനേഷ്യയിൽ

ജിദ്ദ: ജി 20 നേതാക്കളുടെ ഉച്ചകോടിയിൽ പ​ങ്കെടുക്കാൻ സൗദി കിരീടാവകാശിയും പ്രധാനമന്ത്രിയുമായ അമീർ മുഹമ്മദ്​ ബിൻ സൽമാൻ ഇന്തോനേഷ്യയിൽ. ജി 20യിലെ സൗദി പ്രതിനിധി സംഘത്തെ നയിച്ചാണ്​ കിരീടാവകാശി ബാലിയിലെത്തിയത്​. ഉച്ചകോടി വേദിയിൽ കിരീടാവകാശിയെ ഇന്തോനേഷ്യൻ പ്രസിഡന്റ്​ ജോക്കോ വിഡോഡോ സ്വീകരിച്ചു. അംഗ രാജ്യങ്ങളിൽനിന്നുള്ള നേതാക്കളും പ്രതിനിധി സംഘത്തലവന്മാരും സംഗമിച്ച പ്രധാന വേദിയിലെത്തിയ കിരീടാവകാശി പരിപാടിയിൽ സംബന്ധിച്ചു.

ഊർജ മന്ത്രി അമീർ അബ്​ദുൽ അസീസ് ബിൻ സൽമാൻ, പ്രതിരോധ മന്ത്രി അമീർ ഖാലിദ് ബിൻ സൽമാൻ, വിദേശകാര്യ മന്ത്രി അമീർ ഫൈസൽ ബിൻ ഫർഹാൻ, സ്​റ്റേറ്റ്​ മന്ത്രിയും കാബിനറ്റ് അംഗവും ദേശീയ സുരക്ഷ ഉപദേഷ്​ടാവുമായ ഡോ. മുസാഇദ് ബിൻ മുഹമ്മദ് അൽ-ഐബാൻ, വാണിജ്യ-വാർത്ത മന്ത്രി ഡോ. മാജിദ് ബിൻ അബ്​ദുല്ല അൽ-ഖസബി, പരിസ്ഥിതി-ജലം-കൃഷി മന്ത്രി എൻജി. അബ്​ദുറഹ്​മാൻ ബിൻ അബ്​ദുൽ മുഹ്​സിൻ അൽ-ഫദ്‌ലി, ധനകാര്യ മന്ത്രി മുഹമ്മദ് അൽജദാൻ, കമ്യൂണിക്കേഷൻസ് ആൻഡ് ഇൻഫർമേഷൻ ടെക്‌നോളജി മന്ത്രി അബ്​ദുല്ല ബിൻ ആമിർ അൽ-സവാഹ, നിക്ഷേപ മന്ത്രി എൻജി. ഖാലിദ് ബിൻ അബ്​ദുൽ അസീസ് അൽ-ഫാലിഹ്, ആരോഗ്യ മന്ത്രി ഫഹദ് ബിൻ അബ്​ദുല്ല അൽ-ജലാജിൽ എന്നിവർ ജി 20 ഉച്ചകോടി സൗദി പ്രതിനിധി സംഘത്തിലുണ്ട്​.