സൗദിയിൽ കോവിഡ്​ ബാധിതർ രണ്ടായിരത്തിൽ താഴെയായി

റിയാദ്​: സൗദി അറേബ്യയിൽ നിലവിൽ കോവിഡ്​ ബാധിതരായി അവശേഷിക്കുന്നവരുടെ എണ്ണം രണ്ടായിരത്തിൽ താഴെയായി. ആരോഗ്യമന്ത്രാലയം പുറത്തുവിട്ട പുതിയ കണക്ക്​ പ്രകാരം രോഗം ബാധിച്ച്​ ചികിത്സയിലുള്ളത്​ 1970 പേരാണ്​.

അതേസമയം പുതുതായി 117 കോവിഡ്​ കേസുകൾ കൂടി രാജ്യത്ത്​ റിപ്പോർട്ട്​ ചെയ്​തു. അഞ്ച്​​ മരണവും രാജ്യത്ത്​ വിവിധ ഭാഗങ്ങളിലായി റിപോർട്ട്​ ചെയ്​തു. 166 രോഗബാധിതർ സുഖം പ്രാപിച്ചു. ഇതോടെ രാജ്യത്ത്​ റിപ്പോർട്ട്​ ചെയ്​ത കോവിഡ്​ കേസുകളുടെ ആകെ എണ്ണം 363809 ഉം രോഗമുക്തരുടെ എണ്ണം 355548 ഉം ആയി. മരണസംഖ്യ 6291 ആയി ഉയർന്നു.

അസുഖ ബാധിതരായി രാജ്യത്ത്​ ബാക്കിയുള്ള 1970 പേരിൽ 309 പേർ മാത്രമാണ്​ ഗുരുതരാവസ്ഥയിലുള്ളത്​. ഇവർ രാജ്യത്തെ വിവിധ ആശുപത്രികളിലെ തീവ്രപരിചരണ വിഭാഗത്തിലാണ്​. ബാക്കിയുള്ളവരുടെ ആരോഗ്യസ്ഥിതി തൃപ്​തികരമാണ്​. രാജ്യത്തെ കോവിഡ്​ മുക്തി നിരക്ക്​ 97.7 ശതമാനമായി. മരണനിരക്ക്​ 1.7 ശതമാനമായി തുടരുന്നു​.

24 മണിക്കൂറിനിടെ റിപോർട്ട്​ ചെയ്​ത പുതിയ കോവിഡ്​ കേസുകൾ

റിയാദ്​ 47,
മക്ക 22,
കിഴക്കൻ പ്രവിശ്യ 22,
അസീർ 6,
മദീന 5,
വടക്കൻ അതിർത്തി മേഖല 4,
തബൂക്ക്​ 3,
ഹാഇൽ 2,
ഖസീം 2,
ജീസാൻ 2,
നജ്​റാൻ 1,
അൽജൗഫ്​ 1.