സൗദിയിൽ കോവിഡ്​ കേസുകൾ വീണ്ടും ഉയർന്നു

റിയാദ്​: സൗദി അറേബ്യയിൽ പുതിയ കോവിഡ്​ കേസുകൾ പ്രതിദിനം മുന്നൂറിന്​ മുകളിൽ എന്ന നിലയിൽ തന്നെ തുടരുകയാണ്​. തിങ്കളാഴ്​ച ആരോഗ്യ മന്ത്രാലയം പുറത്തുവിട്ട കണക്കുപ്രകാരം 24 മണിക്കൂറിനിടെ 356 പേർക്കാണ്​ പുതുതായി രോഗബാധ സ്ഥിരീകരിച്ചത്​. ഇതിൽ പകുതിയോളം​ റിയാദ്​ മേഖലയിലാണ്​.

രാജ്യത്താകെ 298 രോഗമുക്തിയും റിപ്പോർട്ട്​ ചെയ്​തു. രാജ്യത്ത്​ വിവിധയിടങ്ങളിലായി നാലുപേർ ​കോവിഡ് ബാധിച്ച്​ മരിച്ചു. ഇതോടെ രോഗം ബാധിച്ചവരുടെ ആകെ എണ്ണം 3,70,278 ആയി. ഇതിൽ 3,61,813 പേർ സുഖം പ്രാപിച്ചു. ആകെ മരണസംഖ്യ 6406 ആയി. ബാക്കി 2415 പേർ രാജ്യത്തെ വിവിധ ആശുപത്രികളിലും മറ്റുമായി ചികിത്സയിൽ കഴിയുകയാണ്​. അതിൽ 401 പേരുടെ നില ഗുരുതരമാണ്​. ബാക്കിയുള്ളവരുടെ ആരോഗ്യനില തൃപ്​തികരമാണ്​.

രാജ്യത്തെ കോവിഡ്​ മുക്തി നിരക്ക് 97.6 ശതമാനം ആയി. മരണനിരക്ക്​ 1.7 ശതമാനമാണ്​. കഴിഞ്ഞ 24 മണിക്കൂറിനിടെ വിവിധ മേഖലകളിൽ റിപ്പോർട്ട്​ ചെയ്​ത പുതിയ കോവിഡ്​ കേസുകൾ: റിയാദ്​ 164, കിഴക്കൻ പ്രവിശ്യ 80, മക്ക 47, അൽബാഹ 18, അസീർ 10, മദീന 7, ജീസാൻ 6, നജ്​റാൻ 5, അൽഖസീം 5, അൽജൗഫ്​ 5, വടക്കൻ അതിർത്തി മേഖല 4, ഹാഇൽ 4, തബൂക്ക്​ 1.