സൗദിയിൽ ഇതുവരെ 3.7 ലക്ഷം കോവിഡ്​ കേസുകൾ

റിയാദ്​: കോവിഡ്​ പൊട്ടിപുറപ്പെട്ട ശേഷം സൗദി അറേബ്യയിൽ ഇതുവരെ രോഗം ബാധിച്ചവരുടെ എണ്ണം 3,70,278 ആയി. ഇതിൽ 3,61,515 പേർ സുഖം പ്രാപിച്ചു. 6402 പേർ മരിച്ചു. ബാക്കി 2361 പേർ രാജ്യത്തെ വിവിധ ആശുപത്രികളിലും മറ്റുമായി ചികിത്സയിൽ കഴിയുന്നു. അതിൽ 408 പേരുടെ നില ഗുരുതരമാണ്​. ബാക്കിയുള്ളവരുടെ ആരോഗ്യനില തൃപ്​തികരമാണ്​.

രാജ്യത്തെ കോവിഡ്​ മുക്തി നിരക്ക്​ 97.6 ശതമാനവും മരണനിരക്ക്​ 1.7 ശതമാനവുമാണ്​. ഞായറാഴ്​ച ആരോഗ്യ മന്ത്രാലയം പുറത്തുവിട്ട കണക്കുപ്രകാരം കഴിഞ്ഞ 24 മണിക്കൂറിനിടെ 317 പുതിയ കേസുകളാണ്​ റിപ്പോർട്ട്​ ചെയ്​തത്​. ഇതിൽ പകുതിയും​ റിയാദ്​ മേഖലയിലാണ്​.

രാജ്യത്താകെ 278 രോഗമുക്തിയും റിപ്പോർട്ട്​ ചെയ്​തു. രാജ്യത്ത്​ വിവിധയിടങ്ങളിലായി അഞ്ച്​​​ മരണങ്ങളാണ്​ ​കോവിഡ്​ മൂലമുണ്ടായത്​. കഴിഞ്ഞ 24 മണിക്കൂറിനിടെ വിവിധ മേഖലകളിൽ റിപ്പോർട്ട്​ ചെയ്​ത പുതിയ കോവിഡ്​ കേസുകൾ: റിയാദ്​ 153, കിഴക്കൻ പ്രവിശ്യ 71, മക്ക 35, മദീന 18, അൽബാഹ 9, അൽഖസീം 6, അസീർ 5, ഹാഇൽ 5, വടക്കൻ അതിർത്തി മേഖല 4, അൽജൗഫ്​​ 4, നജ്​റാൻ 3, ജീസാൻ 2, തബൂക്ക്​ 2.