സൗദിയിൽ കോവിഡ്​ കേസുകൾ വീണ്ടും 400ന്​ മുകളിൽ

റിയാദ്​: സൗദി അറേബ്യയിൽ പുതിയ കോവിഡ്​ കേസുകളുടെ പ്രതിദിന എണ്ണം രണ്ടാഴ്​ചക്കിടയിൽ വീണ്ടും 400ന്​ മുകളിലായി. ചൊവ്വാഴ്​ച 471 പേർക്കാണ്​ പുതുതായി​ കോവിഡ്​ സ്ഥിരീകരിച്ചത്​. രോഗബാധിതരിൽ 493 പേർ കൂടി​ സുഖം പ്രാപിച്ചു. 17 പേർ രാജ്യത്തെ വിവിധ ഭാഗങ്ങളിലായി മരിച്ചു. ആകെ കേസുകളുടെ എണ്ണം 351455 ആയി. രോഗമുക്തരുടെ ആകെ എണ്ണം 338281 ആയി ഉയർന്നു. ആകെ മരണസംഖ്യ 5576 ആയി.

7598 പേർ രാജ്യത്തെ വിവിധ ആശുപത്രികളിലും മറ്റും ചികിത്സയിൽ കഴിയുന്നു. ഇതിൽ 794 പേർ ഗുരുതരാവസ്ഥയിലാണ്​. ഇവർ തീവ്രപരിചരണ വിഭാഗത്തിലാണ്​. രാജ്യത്തെ കോവിഡ്​ മുക്തി നിരക്ക്​ 96.3 ശതമാനമായി ഉയർന്നു. മരണനിരക്ക്​ 1.6 ശതമാനമായി തുടരുന്നു.

24 മണിക്കൂറിനിടെ രാജ്യത്ത്​ പുതിയ കോവിഡ്​ കേസുകൾ ഏറ്റവും കൂടുതൽ റിപ്പോർട്ട്​ ചെയ്​തത്​ മദീനയിലാണ്, 66. റിയാദ്​​​​​ 60, മക്ക​ 36, ജിദ്ദ 26, ബുറൈദ 22, ഹുഫൂഫ്​​​ 18, ഹാഇൽ 18, ഖമീസ്​ മുശൈത്​​​ 16, ബൽജുറൈഷി​​ 10, മഹദ്​ അൽദഹബ്​​ 10, മിദ്​നബ്​​ 8, ഉനൈസ​​​ 8, ദമ്മാം 8, മഖ്​വ 7 എന്നിങ്ങനെയാണ് പ്രധാന നഗരങ്ങളിൽ പുതുതായി രേഖപ്പെടുത്തിയ കോവിഡ് രോഗികളുടെ എണ്ണം.