ആശ്വാസ പാക്കേജുമായി സൗദി ധന മന്ത്രാലയം

റിയാദ്​: കോവിഡ്​ പശ്ചാത്തലത്തിൽ വ്യാപാര മേഖലയ്​ക്കും തൊഴിലാളികൾക്കും ആശ്വാസം പകർന്ന്​ 12000 കോടി റിയാലി​​െൻറ ആശ്വാസ പാക്കേജ് പ്രഖ്യാപിച്ചു. വിദേശികളുടെ ലെവി നിശ്ചിത കാലത്തേക്ക് സര്‍ക്കാര്‍ അടക്കുന്നത് ഉള്‍പ്പെടെയുള്ള പാക്കേജാണ് പ്രഖ്യാപിച്ചത്.

പ്രധാന പ്രഖ്യാപനങ്ങള്‍:
1. മാർച്ച്​ 20 മുതൽ ജൂണ്‍ 30 വരെ കാലയളവില്‍ ഇഖാമയുടെ കാലാവധി അവസാനിച്ചവര്‍ക്ക് ലെവിയില്ലാതെ കാലാവധി നീട്ടിനല്‍കും. മൂന്ന് മാസത്തേക്കാണ് ഇഖാമ കാലാവധി നീട്ടിനല്‍കുക.

2. സൗദിയിലേക്ക്​ സ്​റ്റാമ്പ് ചെയ്യാത്ത തൊഴില്‍ വിസയുടെ കാലാവധി മൂന്നു മാസത്തേക്ക്​ കൂടി നീട്ടിനൽകും. അല്ലെങ്കിൽ വിസയുടെ പണം തൊഴിലുടമക്ക് തിരികെ നല്‍കും. ഇതിന് പ്രത്യേക ഫീസൊന്നും ഈടാക്കില്ല. നിലവിൽ പാസ്പോര്‍ട്ടില്‍ വര്‍ക്ക് വിസ സ്​റ്റാമ്പ്​ ചെയ്തവര്‍ക്കും ഈ ആനുകൂല്യം ലഭിക്കും.

3. റീ എന്‍ട്രി വിസ മൂന്ന്​ മാസത്തേക്ക് നീട്ടിനല്‍കാന്‍ തൊഴിലുടമകള്‍ക്ക് സാധിക്കും. നിലവില്‍ റീ എന്‍ട്രിയില്‍‌ വിസ അടിച്ച് നാട്ടില്‍ പോകാന്‍ കഴിയാത്തവര്‍ക്കും ഇതി​ൻെറ ഗുണം ലഭിക്കും.

4. സകാത്ത്, മൂല്യവര്‍ധിത നികുതി, എക്സൈസ് ഡ്യൂട്ടി, വരുമാന നികുതി എന്നിവ അടക്കാന്‍ മൂന്നു മാസത്തെ സാവകാശം നല്‍കി. രാജ്യത്തേക്ക് മാർച്ച്​ 20 മുതല്‍ 30 ദിവസത്തേക്ക് ഇറക്കുമതിക്കുള്ള തീരുവ തല്‍ക്കാലത്തേക്ക് ഈടാക്കില്ല.

5. ബാങ്കുകളുടെയും മുനിസിപ്പാലിറ്റി (ബലദിയ)യുടെയും ഫീസുകളും ചാർജുകളും അടയ്​ക്കാന്‍ മൂന്നു മാസ സാവകാശം നല്‍കി. ഇതിന് നിശ്ചിത നിബന്ധനകള്‍ പാലിക്കണം. സര്‍ക്കാറിലേക്ക് സ്വകാര്യ സ്ഥാപനങ്ങള്‍ അടക്കാനുള്ള വിവിധ ഫീസുകള്‍ അടക്കാന്‍ മൂന്ന് മാസത്തെ സാവകാശം നല്‍കി.

6. ചെറുകിട, ഇടത്തരം സ്ഥാപനങ്ങള്‍ക്ക് 70 ശതകോടി റിയാലി​​െൻറ സഹായ പാക്കേജ് പ്രഖ്യാപിച്ചു. വായ്​പകള്‍ ഈ വര്‍ഷാവസാനം വരെ ഉദാരമാക്കാനും തീരുമാനിച്ചു.