സൗദിയിൽ കൂടുതൽ രോഗികൾ റിയാദിലും കിഴക്കൻ പ്രവിശ്യയിലും

റിയാദ്​: സൗദി അറേബ്യയിൽ പുതിയ കോവിഡ്​ ബാധിതരുടെ എണ്ണം കുത്തനെ കൂടുന്നു. തലസ്ഥാനമായ റിയാദിലും കിഴക്കൻ പ്രവിശ്യയിലുമാണ്​ കൂടുതൽ രോഗികൾ. ശനിയാഴ്​ച ആരോഗ്യ മന്ത്രാലയം പുറത്തുവിട്ട കണക്കുപ്രകാരം 386 പേരാണ്​ പുതിയ രോഗികൾ. ഇതിൽ നല്ലൊരു പങ്ക്​ റിയാദിലും കിഴക്കൻ പ്രവിശ്യയിലുമാണ്​.

ഏറെക്കാലത്തിന്​ ശേഷമാണ്​ ദമ്മാം ഉൾപ്പെടുന്ന കിഴക്കൻ പ്രവി​ശ്യയിൽ പ്രതിദിന രോഗികളുടെ എണ്ണം നൂറിന്​ മുകളിലെത്തുന്നത്​. രോഗമുക്തരുടെ എണ്ണം ഉയരുന്നതാണ്​ നേരിയ ആശ്വാസം. രാജ്യത്താകെ 283 പേരാണ്​ കഴിഞ്ഞ 24 മണിക്കൂറിനിടെ സുഖം പ്രാപിച്ചത്​​. രാജ്യത്ത്​ വിവിധയിടങ്ങളിലായി നാല്​​​ മരണങ്ങൾ റിപ്പോർട്ട്​ ചെയ്​തു. ഇതോടെ രാജ്യത്ത്​ റിപ്പോർട്ട്​ ചെയ്​ത കോവിഡ്​ കേസുകളുടെ ആകെ എണ്ണം 369961 ഉം രോഗമുക്തരുടെ എണ്ണം 361237 ഉം ആയി. ആകെ മരണസംഖ്യ 6397 ആയി ഉയർന്നു.

അസുഖ ബാധിതരായി ചികിത്സയിൽ കഴിയുന്നവരുടെ എണ്ണം 2327 ആയി കുറഞ്ഞു. ഇതിൽ ഗുരുതരാവസ്ഥയിലുള്ളവരുടെ എണ്ണം 401 ആണ്​​​. ഇവർ രാജ്യത്തെ വിവിധ ആശുപത്രികളിൽ തീവ്രപരിചരണ വിഭാഗത്തിലാണ്​. ബാക്കിയുള്ളവരുടെ ആരോഗ്യസ്ഥിതി തൃപ്​തികരമാണ്​. രാജ്യത്തെ കോവിഡ്​ മുക്തി നിരക്ക്​ 97.7 ശതമാനവും മരണനിരക്ക്​ 1.7 ശതമാനവുമായി തുടരുന്നു​.

കഴിഞ്ഞ 24 മണിക്കൂറിനിടെ വിവിധ മേഖലകളിൽ റിപ്പോർട്ട്​ ചെയ്​ത പുതിയ കോവിഡ്​ കേസുകൾ: റിയാദ്​ 154, കിഴക്കൻ പ്രവിശ്യ 110, മക്ക 54, മദീന 19, നജ്​റാൻ 12, അൽബാഹ 11, അൽഖസീം 7, അസീർ 6, വടക്കൻ അതിർത്തി മേഖല 5, ഹാഇൽ 4, ജീസാൻ​ 2, അൽജൗഫ്​​ 1, തബൂക്ക്​ 1.