സൗദിയിൽ കോവിഡ്​ ആക്​ടീവ്​ കേസുകൾ 5,000ന്​ താഴെയായി

റിയാദ്​: സൗദി അറേബ്യയിൽ കോവിഡ്​ ആക്​ടീവ്​ കേസുകൾ 5,000ന്​ താഴെയായി. അസുഖ ബാധിതരായി രാജ്യത്ത്​ അവശേഷിക്കുന്നവരുടെ എണ്ണം ഞായറാഴ്​ചയോടെ ​ 4835 ആയി കുറഞ്ഞു. ഇതിൽ 674 പേർ മാത്രമാണ്​ ഗുരുതരനിലയിലുള്ളത്​. ഇവർ തീവ്രപരിചരണ വിഭാഗത്തിലാണ്​. 217 പേർക്കാണ്​ ഞായറാഴ്​ച​ കോവിഡ് സ്ഥിരീകരിച്ചത്​.

14 പേർ രാജ്യത്തെ വിവിധയിടങ്ങളിൽ മരിച്ചു. 386 പേർ കോവിഡ്​ മുക്തരായി. ആകെ കോവിഡ്​ കേസുകളുടെ എണ്ണം 357128 ആയി. രോഗമുക്തരുടെ ആകെ എണ്ണം 346409 ആയി ഉയർന്നു. ആകെ മരണസംഖ്യ 5884 ആണ്​. രാജ്യത്തെ കോവിഡ്​ മുക്തി നിരക്ക്​ 96.7 ശതമാനവും മരണനിരക്ക്​ 1.6 ശതമാനവുമായി തുടരുന്നു.

കഴിഞ്ഞ 24 മണിക്കൂറിനിടെ വിവിധ മേഖലകളിൽ റിപ്പോർട്ട്​ ചെയ്​ത പുതിയ കോവിഡ്​ കേസുകൾ: റിയാദ്​ 75, മക്ക 35, മദീന 29, ഇൗസ്​റ്റേൺ 18, ഖസീം 14, അസീർ 13, അൽബാഹ 9, തബൂക്ക്​ 7, ജീസാൻ 6, നജ്​റാൻ 6, അൽജൗഫ്​ 2, ഹാഇൽ 2, വടക്കൻ മേഖല 1. രാജ്യത്ത്​ കോവിഡ്​ വ്യാപനത്തിന്​ ശമനം കണ്ടുതുടങ്ങിയെന്നും ദിനംപ്രതിയുള്ള കോവിഡ്​ സ്ഥിതിവിവര പ്രഖ്യാപനത്തോടൊപ്പം​ പ്രതിവാര അവലോന റിപ്പോർട്ടും​ ഇനി പുറത്തുവിടുമെന്ന്​ സൗദി ആരോഗ്യമന്ത്രാലയ വക്താവ്​ ഡോ. മുഹമ്മദ്​ അബ്​ദു അൽഅലി വാർത്താസമ്മേളനത്തിൽ പറഞ്ഞു.