മുംബൈ കോൺസുലേറ്റിൽ വിസാസ്​റ്റാമ്പിങ്​ തുടങ്ങി

റിയാദ്​: ഇന്ത്യയിൽ നിന്ന്​ സൗദിയിലേക്കുള്ള ചില വിസകളുടെ മാത്രം സ്​റ്റാമ്പിങ്​ നടപടി മുംബൈയിലെ ​സൗദി കോൺസ​ുലേറ്റ്​ പുനരാരംഭിച്ചു. സൗദിയിലെ ഇന്ത്യൻ ആരോഗ്യപ്രവർത്തകരുടെ കുടുംബാംഗങ്ങൾക്കുള്ള വിസകളുടെയും ഗവൺമെൻറ്​ തലത്തിലുള്ള സന്ദർശന വിസകളുടെയും​ സ്​റ്റാമ്പിങ്​ നടപടിയാണ്​​ വ്യാഴാഴ്​ച മുതൽ ആരംഭിച്ചത്​.

സൗദി ആരോഗ്യസ്ഥാപനങ്ങളിൽ ജോലി ചെയ്യുന്ന ഡോക്​ടർ, നഴ്​സ്​, മറ്റ്​ പാരാമെഡിക്കൽ ജീവനക്കാർ എന്നിവരുടെ കുടുംബാംഗങ്ങൾക്കാണ്​ പുതിയ വിസയിൽ സൗദിയിലേക്ക്​ വരാൻ അനുമതി. അതുപോലെ ഗവൺമെൻറ്​ തലത്തിലുള്ള ആവശ്യങ്ങൾക്കായി സന്ദർശന വിസയിൽ വരാൻ നിൽക്കുന്നവർക്കും അനുമതിയുണ്ട്​. ഇത്തരം വിസകൾ സ്​റ്റാമ്പിങ്ങിനായി അയക്കാൻ ഇന്ത്യയിലെ അംഗീകൃത റിക്രൂട്ടിങ്​ ഏജൻസികൾക്ക്​ സൗദി കോൺസുലേറ്റ്​ അറിയിപ്പ്​ നൽകി.