തൊഴിലാളികൾക്ക് ഏറെ ഉപകാരപ്പെടുന്ന സൗദിയിലെ പുതിയ തൊഴിൽ പരിഷ്​കരണ പദ്ധതി ഞായറാഴ്​ച മുതൽ

ജിദ്ദ: സൗദിയിൽ പുതിയ തൊഴിൽ പരിഷ്​കരണ പദ്ധതി നടപ്പിലാക്കാൻ ഇനി നാല്​​ ദിവസം മാത്രം. സ്വകാര്യ മേഖലയിലെ തൊഴിലുടമയും തൊഴിലാളിയും തമ്മിലുള്ള കരാർ ബന്ധം ​മെച്ചപ്പെടുത്തുന്നതിനുള്ള പുതിയ തൊഴിൽ പരിഷ്​ക്കരണ പദ്ധതി കഴിഞ്ഞ നവംബർ നാലിനാണ്​ സൗദി മാനവവിഭവശേഷി സാമൂഹിക വികസന മന്ത്രാലയം പ്രഖ്യാപിച്ചത്​. 2021 മാർച്ച്​ 14 ഞായറാഴ്​ച മുതൽ പദ്ധതി പ്രാബല്യത്തിൽ വരുമെന്ന്​ വ്യക്തമാക്കുകയും ചെയ്​തിരുന്നു. പദ്ധതി പരിചയപ്പെടുത്താനും സംശയങ്ങൾ ദുരീകരിക്കാനും ഇതിനകം വിവിധങ്ങളായ പരിപാടികൾ വിവിധ ചേംബറുകളുമായി സഹകരിച്ച്​ സംഘടിപ്പിച്ചിട്ടുണ്ട്.

ദേശീയ പരിവർത്തന പരിപാടിയുടെ ഭാഗമായാണ്​ തൊഴിലുടമയും തൊഴിലാളിയും തമ്മിലുള്ള കരാർ ബന്ധം ​മെച്ചപ്പെടുത്താൻ സഹായിക്കുന്ന പുതിയ തൊഴിൽ പരിക്ഷ്​ക്കരണ പദ്ധതി നടപ്പിലാക്കുന്നത്​.​ വ്യവസ്​ഥാപിതവും ആകർഷകവുമായ രീതിയിൽ തൊഴിൽ വിപണി കെട്ടിപ്പടുക്കുക, ആഗോള വിപണിയുമായുള്ള മത്സരശേഷി വർധിപ്പിക്കുക, മാനുഷികമായ കഴിവുകൾ ശാക്​തീകരിക്കുക, നല്ല തൊഴിൽ അന്തരീക്ഷം സൃഷ്​ടിക്കുക, ഉൽപാദന ക്ഷമത വർധിപ്പിക്കുക, വിദഗ്​ധരായവരെ സൗദി വിപണിയിലേക്ക്​ ആകർഷിക്കുക, തൊഴിൽ തർക്കങ്ങൾ ഇല്ലാതാക്കുക എന്നിവയാണ്​ പ്രധാനമായും പരിഷ്​കരണത്തിലൂടെ​ മന്ത്രാലയം ലക്ഷ്യമിടുന്നത്​.

തൊഴിൽ അന്തരീക്ഷം കാര്യക്ഷമമാക്കാനും മെച്ചപ്പെടുത്തുന്നതിനും മന്ത്രാലയം പല പരിപാടികളും നേരത്തെ നടത്തിയിട്ടുണ്ട്​. ആ ശ്രമങ്ങളുടെ പൂർത്തീകരണത്തി​െൻറ ഭാഗമാണ് ഞായറാഴ്​ച മുതൽ​​ നടപ്പിലാക്കാൻ പോകുന്ന പുതിയ തൊഴിൽ പരിഷ്​കരണ പദ്ധതി.

തൊഴിലുടമയും തൊഴിലാളിയും തമ്മിലുള്ള കരാർബന്ധം മെച്ചപ്പെടുത്തുന്നതിനാവശ്യമായ കാര്യങ്ങൾ മാനവവിഭവ ശേഷി മന്ത്രാലയം പുതിയ തൊഴിൽ പരിഷ്​കരണ പദ്ധതിയിൽ ഉൾ​കൊള്ളിച്ചിട്ടുണ്ട്​. സ്വകാര്യ മേഖലയിൽ ജോലി ചെയ്യുന്ന എല്ലാ വിദേശ തൊഴിലാളികളും പദ്ധതിയിൽ ഉൾപ്പെടുമെന്ന്​ മ​ന്ത്രാലയം വ്യക്തമാക്കിയിട്ടുണ്ട്​. 'അബ്​ശിർ, ഖുവ പ്ലാറ്റ്​ഫോമുകളിലുടെ സേവനം ലഭ്യമാക്കും. തൊഴിലുടമയുടെ അംഗീകാരത്തിന്‍റെ ആവശ്യമില്ലാതെ തൊഴിലാളിക്ക്​ തൊഴിൽ മാറ്റം അനുവദിക്കും, റീഎൻട്രി, എക്​സിറ്റ്​ വിസകൾ തൊഴിലാളിക്ക് ​സ്വന്തമായി നേടാൻ സാധിക്കും.വിവരം തൊഴിലുടമയെ ഇ-സംവിധാനം വഴിയായിരിക്കും അറിയിക്കുക.

കരാർ സേവനം അവസാനിച്ച ഉടൻ തൊഴിലാളിക്ക് അന്തിമ എക്​സിറ്റ്​ സേവനവും ലഭ്യമാകും. അതിനു തൊഴിലുടമയുടെ സമ്മതം ആവശ്യമില്ല തുടങ്ങിയവ പുതിയ തൊഴിൽ പരിഷ്​കരണത്തിലുൾപ്പെടും. എന്നാൽ പുതിയ പരിഷ്കരണ പദ്ധതിയിൽ ഗാർഹിക തൊഴിലാളികൾ ഉൾപ്പെടുകയില്ല.

ആഭ്യന്തര വകുപ്പ്​, ദേശീയ ഇൻഫർമേഷൻ സെൻറർ എന്നിവയുടെ പങ്കാളിത്തത്തോടും മറ്റ്​ സർക്കാർ​ വകുപ്പുകളുടെ പിന്തുണയോടെയും നിരവധി പഠന, ഗവേഷണങ്ങളുടെ അടിസ്​ഥാനത്തിലാണ്​ പുതിയ തൊഴിൽ പരിഷ്​കരണ പദ്ധതി മാനവ വിഭവശേഷി മന്ത്രാലയം വികസിപ്പിച്ചത്​. സ്വകാര്യ മേഖലയും സൗദി ചേംബർ കൗൺസിലുമായും നിരവധി മീറ്റിങ്ങുകൾ ഇതിനായി നടത്തിയിരുന്നു.