സ്​പോൺസർഷിപ്പ്​ സ​മ്പ്രദായം നിർത്തലാക്കൽ: നിജസ്ഥിതി വെളിപ്പെടുത്തി​ സൗദി മാനവവിഭവ ശേഷി മന്ത്രാലയം

ജിദ്ദ: സൗദി അറേബ്യയിൽ തൊഴിൽ രംഗത്തെ സ്​പോൺസർഷിപ്പ്​ സ​മ്പ്രദായം നിർത്തലാക്കൽ സംബന്ധിച്ച്​ നിജസ്ഥിതി വെളിപ്പെടുത്തി മാനവ വിഭവശേഷി മന്ത്രാലയം. സ്​പോൺസർഷിപ്പ്​ സംവിധാനം നിർത്തലാക്കുന്നതിനെക്കുറിച്ച്​ പ്രചരിക്കുന്ന വാർത്തകളുടെ യാഥാർഥ്യം​ മന്ത്രാലയ വക്താവ്​ നാസർ അൽഹസാനി ഒൗദ്യോഗിക ട്വീറ്ററിലാണ്​ വിശദീകരിച്ചത്​.

നിലവിൽ ഇത്തരത്തിൽ ഒരു വാർത്ത ഒൗദ്യോഗിക സോഴ്​സുകൾ പുറത്തുവിട്ടിട്ടില്ല. രാജ്യത്തെ തൊഴിൽ വിപണി വ്യവസ്ഥാപിതമാക്കുന്നതിനും വികസിപ്പിക്കുന്നതിനും നിരവധി പദ്ധതികൾ മന്ത്രാലയം ആവിഷ്​കരിക്കുകയാണ്​​​. അവ തയ്യാറായാൽ ഉടൻ ഒൗദ്യോഗികമായി പ്രഖ്യാപിക്കും. മന്ത്രാലയവുമായി ബന്ധപ്പെട്ട എന്ത്​ വിവരവും ഒൗദ്യോഗിക ഉറവിടങ്ങളിൽ നിന്നുള്ളവ മാത്രമേ വിശ്വസിക്കാവൂ എന്നും പങ്കുവെക്കാൻ പാടുള്ളൂ എന്നും അദ്ദേഹം മുന്നറിയിപ്പ്​ നൽകി.

ചൊവ്വാഴ്​ചയാണ്​ സൗദിയിൽ സ്​പോൺസർഷിപ്പ്​ സംവിധാനം റദ്ദാക്കാനും പകരം തൊഴിലുടമകളും ജീവനക്കാരും തമ്മിൽ പുതിയ കരാറുണ്ടാക്കാനും പദ്ധതിയിടുന്നുവെന്നും ഏതാനും ആഴ്​ചകൾക്കുള്ളിൽ അതു പ്രഖ്യാപിക്കുമെന്നും പേർ വ്യക്തമാക്കാത്ത വൃത്തങ്ങളെ ഉദ്ധരിച്ച് ഒരു അറബിക്​​ ഒാൺലൈൻ പത്രം റിപ്പോർട്ട് ​ചെയ്​തത്​. ഇൗ വാർത്തയെ അടിസ്ഥാനമാക്കി ലോകതലത്തിലുള്ളവ അടക്കം നിരവധി പത്രങ്ങളും ചാനലുകളും റിപ്പോർട്ട്​ ചെയ്യുകയും സമൂഹ മാധ്യമങ്ങളിൽ വ്യാപകമായി പ്രചരിക്കുകയും ചെയ്​ത സാഹചര്യത്തിലാണ്​​ മാനവ വിഭവശേഷി മന്ത്രാലയം സത്യാവസ്ഥ വിശദീകരിച്ചത്​.