ഫലസ്തീന് സൗദി സഹായമായി ഒമ്പത്​ കോടി ഡോളർ കൂടി നൽകി

റിയാദ്: ഫലസ്തീൻ ട്രഷറിക്ക് സഹായമായി സൗദി അറേബ്യ ഒമ്പത്​ കോടി ഡോളർ കൂടി നൽകി. അമ്മാനിലെ സൗദി എംബസിയിൽ നടന്ന കൂടിക്കാഴ്ചയിൽ ജോർദാനിലെ സൗദി അംബാസഡറും ഫലസ്തീനിലെ നോൺ-റസിഡൻറ്​ അംബാസഡറുമായ അമീർ മൻസൂർ ബിൻ ഖാലിദ് ബിൻ ഫർഹാൻ ആലു സഊദ്, ഫലസ്തീൻ ആസൂത്രണ, അന്താരാഷ്​ട്ര സഹകരണ മന്ത്രി ഇസ്തിഫാൻ സലാമക്ക് സൗദി ഗ്രാൻറ്​ കൈമാറി. ഈ വർഷം തന്നെ മുമ്പും സൗദി സഹായം നൽകിയിരുന്നു. അതി​ന്റെ തുടർച്ചയാണിത്​.

ഫലസ്തീൻ ജനതയെയും സ്വതന്ത്ര രാഷ്​ട്രം സ്ഥാപിക്കുന്നതിനുള്ള ന്യായവും നിയമാനുസൃതവുമായ അവകാശങ്ങളെയും സൗദി ​അറേബ്യ പൂർണമായും പിന്തുണയ്ക്കുകയാണെന്നും അക്കാര്യത്തിൽ സൗദിയുടെ ഉറച്ചതും ചരിത്രപരവും നിരന്തരവുമായ പ്രതിബദ്ധതയാണുള്ളതെന്നും അംബാസഡർ അമീർ മൻസൂർ ബിൻ ഖാലിദ് ഊന്നിപ്പറഞ്ഞു. ഫലസ്തീൻ ഗവൺമെൻറി​ന്റെ സാമ്പത്തിക ബാധ്യതകൾ നിറവേറ്റുന്നതിൽ സഹായിക്കാനുള്ള സൗദി ഭരണകൂടത്തി​ന്റെ താൽപര്യത്താലാണ്​ ഈ സഹായമെന്നും അദ്ദേഹം കൂട്ടിച്ചേർത്തു.

അത്യന്തം പ്രയാസമേറിയ ഈ സാഹചര്യത്തിൽ സൗദി അറേബ്യയുടെ ഈ സഹായം സാമ്പത്തിക സ്ഥിരതയെ ശക്തിപ്പെടുത്തുമെന്ന് ഫലസ്തീൻ വൈസ് പ്രസിഡൻറ്​ ഹുസൈൻ അൽ ശൈഖ് പ്രസ്താവിച്ചു. ഫലസ്തീൻ ജനതയോടുള്ള സൗദിയുടെ ഉറച്ച നിലപാടുകളെയും അവകാശങ്ങൾക്കായുള്ള പിന്തുണയെയും അദ്ദേഹം പ്രശംസിച്ചു.