സൗദി അറേബ്യ രാജ്യാന്തര യാത്രാ നിരോധനം നീക്കുന്നു; ജനുവരി ഒന്നു മുതൽ മുഴുവൻ അതിർത്തികളും തുറക്കും

ജിദ്ദ: കോവിഡ്​ മൂലം ഏർപ്പെടുത്തിയ യാത്രാനിരോധനം 2021 ജനുവരി ഒന്നിന്​ പൂർണമായും എടുത്തുമാറ്റുമെന്ന്​ സൗദി ആഭ്യന്തര മന്ത്രാലയം അറിയിച്ചു. രാജ്യത്തിന്​ പുറത്തുപോകാനും മടങ്ങിവരാനും ഏർപ്പെടുത്തിയ നിയന്ത്രണങ്ങളാണ്​ എടുത്തുകളയുന്നത്​. സെപ്​റ്റംബർ 15ന്​ ചൊവ്വാഴ്​ച രാവിലെ ആറ്​ മുതൽ ഭാഗികമായി നിയന്ത്രണങ്ങൾ നീക്കും. പ്രത്യേക സാഹചര്യങ്ങളിലുള്ളവർക്ക്​ രാജ്യത്തേക്ക്​ മടങ്ങിവരാനും പുറത്തേക്ക്​ പോകാനുമുള്ള അനുവാദമാണ്​ ചൊവ്വാഴ്​ച മുതൽ നൽകുന്നത്​.

മറ്റ്​ ജി.സി.സി രാജ്യങ്ങളിലുള്ള സൗദി പൗരന്മാർക്കും തൊഴിൽ റീഎൻട്രി വിസ, സന്ദർശന വിസ എന്നിവയുള്ള വിദേശികളും ഉൾപ്പെടെയുള്ളവർക്കാണ്​ ചൊവ്വാഴ്​ച മുതൽ പ്രവേശനാനുമതി നൽകുന്നത്​. ഇവരെല്ലാം കോവിഡ്​ മുക്തമാണെന്ന്​ തെളിയിക്കുന്ന രേഖകൾ ഹാജരാക്കണം​.

പ്രവേശന കവാടത്തിലെത്തുന്നതിന്​ 48 മണിക്കൂർ മുമ്പ്​ ഇഷ്യൂ ചെയ്​ത രേഖയായിരിക്കണം. അതേസമയം, നിരോധനം പൂർണമായും നീക്കുന്ന ജനുവരി ഒന്നിന്​ 30 ദിവസം മുമ്പ് പ്രവേശന കവാടങ്ങൾ തുറക്കുന്ന സമയം എപ്പോഴാണെന്ന്​​ പ്രഖ്യാപിക്കും. ആ സമയത്ത്​ പ്രവേശന കവാടങ്ങളിൽ യാത്രക്കാർക്കും വാഹനങ്ങൾക്കും വേണ്ട ആരോഗ്യ മുൻകരുതലും ആവശ്യകതകളും സജ്ജീകരിക്കാനുള്ള അപേക്ഷ സമർപ്പിക്കാം.

എന്നാൽ സർക്കാർ ഉദ്യോഗസ്ഥ​ർ, സൈനികർ, ഒൗദ്യോഗിക ചുമതലകളിൽ നിയോഗിക്കപ്പെട്ടവർ, വിദേശത്ത്​ സൗദി നയതന്ത്ര കാര്യാലയങ്ങളിലെ ജീവനക്കാർ, അവരുടെ ആശ്രിതർ, വ്യവസായ പ്രമുഖർ, വിദേശ രാജ്യങ്ങളിൽ ചികിത്സവേണ്ട രോഗികൾ, സ്​കോളർഷിപ്പ്​ വിദ്യാർഥികൾ തുടങ്ങിയവരെ സെപ്​റ്റംബർ 15 മുതൽ ഏതുസമയവും​ രാജ്യത്തുനിന്ന്​ പുറത്തേക്ക്​ പോകാനും തിരിച്ചുവരാനും അനുവദിക്കും. ജി.സി.സി രാജ്യങ്ങളിലെ പൗരന്മാരെയും രാജ്യത്തേക്ക്​ പ്രവേശിക്കാനും പുറത്തുപോകാനും അനുവദിക്കും.

തൊഴിൽ വിസ, റീഎൻട്രി, സന്ദർശന വിസകളുള്ള മറ്റെല്ലാ രാജ്യക്കാർക്കും പ്രവേശനം അനുവദിക്കും. ഗൾഫ്​ രാജ്യങ്ങളിൽ നിന്നുള്ളവരും സൗദികളല്ലാത്തവരുമായ എല്ലാവരും കർശന ആരോഗ്യ മുൻകരുതൽ നിബന്ധനകൾ പാലിച്ചിരിക്കണം​. എന്നാൽ, ഉംറ തീർഥാടകർക്കുള്ള യാത്രാനിരോധനം നീക്കുന്നത്​ ഘട്ടംഘട്ടമായായിരിക്കും. അത്​ സംബന്ധിച്ച പ്രഖ്യാപനം പിന്നീടുണ്ടാകും.