തീവ്രവാദവിരുദ്ധ പദ്ധതിക്ക് മൂന്നുലക്ഷം ഡോളർ നൽകി സൗദി

ജുബൈൽ: ആഗോളതലത്തിൽ തീവ്രവാദത്തെ ചെറുക്കുന്നതിനുള്ള പദ്ധതി പ്രവർത്തനങ്ങൾക്ക് സൗദി അറേബ്യ മൂന്നുലക്ഷം ഡോളർ സംഭാവന ചെയ്തു. ഐക്യരാഷ്ട്ര സഭ ആസ്ഥാനത്ത് നടന്ന ചടങ്ങിൽ മൂന്ന് ലക്ഷം ഡോളറിന്റെ ചെക്ക് സഭയിലെ സൗദി പ്രതിനിധി അബ്ദുൽ അസീസ് ബിൻ മുഹമ്മദ് അൽ-വാസൽ യു.എൻ തീവ്രവാദ വിരുദ്ധ വിഭാഗം അണ്ടർ സെക്രട്ടറി വ്ലാദിമിർ വോർങ്കോവിന് കൈമാറി.

തീവ്രവാദത്തെയും ഭീകരതയെയും നേരിടാൻ യു.എൻ ഭീകരവിരുദ്ധ ഓഫിസ് വഹിക്കുന്ന പങ്കിനെ അൽ-വാസൽ അഭിനന്ദിച്ചു. പ്രാദേശികമായും അന്തർദേശീയമായും ഈ പ്രതിഭാസത്തെ തുടച്ചുനീക്കാനുള്ള ശ്രമങ്ങളുമായി രാജ്യം മുന്നോട്ടുപോവുകയാണെന്ന് അദ്ദേഹം വ്യക്തമാക്കി.