സൗദിയിൽ 261 പേർക്ക്​ കോവിഡും 274 പേർക്ക്​ രോഗമുക്തിയും

റിയാദ്​: സൗദി അറേബ്യയിൽ ഞായറാഴ്​ച 261 പേർക്ക്​ കൂടി പുതുതായി കോവിഡ്​ സ്ഥിരീകരിച്ചു. 274 പേർ സുഖം പ്രാപിച്ചു . രാജ്യത്ത്​ വിവിധയിടങ്ങളിലായി മൂന്നു മരണങ്ങളും റിപ്പോർട്ട്​ ചെയ്​തു. ഇതോടെ രാജ്യത്ത്​ റിപ്പോർട്ട്​ ചെയ്​ത കോവിഡ്​ കേസുകളുടെ ആകെ എണ്ണം 368074 ഉം രോഗമുക്തരുടെ എണ്ണം 359573 ഉം ആയി. ആകെ മരണസംഖ്യ 6375 ആയി ഉയർന്നു.

അസുഖ ബാധിതരായി ചികിത്സയിൽ കഴിയുന്നവരുടെ എണ്ണം 2126 ആയി കുറഞ്ഞു. ഇതിൽ ഗുരുതരാവസ്ഥയിലുള്ളവരുടെ എണ്ണം 362 ആണ്​​​. ഇവർ രാജ്യത്തെ വിവിധ ആശുപത്രികളിൽ തീവ്രപരിചരണ വിഭാഗത്തിലാണ്​. ബാക്കിയുള്ളവരുടെ ആരോഗ്യസ്ഥിതി തൃപ്​തികരമാണ്​.

രാജ്യത്തെ കോവിഡ്​ മുക്തി നിരക്ക്​ 97.7 ശതമാനവും മരണനിരക്ക്​ 1.7 ശതമാനവുമായി തുടരുന്നു​. കഴിഞ്ഞ 24 മണിക്കൂറിനിടെ വിവിധ മേഖലകളിൽ റിപ്പോർട്ട്​ ചെയ്​ത പുതിയ കോവിഡ്​ കേസുകൾ: റിയാദ്​ 93, കിഴക്കൻ പ്രവിശ്യ 53, മക്ക 49, മദീന 16, അസീർ 9, അൽഖസീം 8, വടക്കൻ അതിർത്തി മേഖല 8, അൽബാഹ 7, നജ്​റാൻ 7, ഹാഇൽ 6, അൽജൗഫ്​ 2, തബൂക്ക്​ 2, ജീസാൻ 1.