സൗദിയിൽ പ്രതിദിന രോഗികളുടെ എണ്ണത്തിൽ നേരിയ കുറവ്​

റിയാദ്​: സൗദി അറേബ്യയിൽ കോവിഡ്​ സ്ഥിരീകരിക്കുന്നവരുടെ പ്രതിദിന എണ്ണത്തിൽ നേരിയ കുറവ്​ അനുഭവപ്പെട്ടു. രോഗമുക്തരുടെ എണ്ണം ഉയരുകയും ചെയ്​തു. വെള്ളിയാഴ്​ച ആരോഗ്യമന്ത്രാലയം പുറത്തുവിട്ട കണക്ക്​ പ്രകാരം 353 പേർക്കാണ്​ പുതുതായി രോഗ​ ബാധ സ്ഥിരീകരിച്ചത്​. രാജ്യത്താകെ 305 രോഗികൾ സുഖം പ്രാപിച്ചു​. രാജ്യത്ത്​ വിവിധയിടങ്ങളിലായി നാല്​​ മരണങ്ങളും റിപ്പോർട്ട്​ ചെയ്​തു.

ഇതുവരെ രോഗം സ്ഥിരീകരിച്ചവരുടെ ആകെ എണ്ണം 372073 ആയി. ഇതിൽ 362947 പേർ സുഖം പ്രാപിച്ചു. ആകെ മരണസംഖ്യ 6424 ആയി. 2702 പേർ രാജ്യത്തെ വിവിധ ആശുപത്രികളിലും മറ്റുമായി ചികിത്സയിൽ കഴിയുന്നു.

അതിൽ 447 പേരുടെ നില ഗുരുതരമാണ്​. ബാക്കിയുള്ളവരുടെ ആരോഗ്യനില തൃപ്​തികരമാണ്​. രാജ്യത്തെ ​കോവിഡ്​ മുക്തി നിരക്ക് 97.6 ശതമാനം ആയി. മരണനിരക്ക്​ 1.7 ശതമാനമാണ്​. കഴിഞ്ഞ 24 മണിക്കൂറിനിടെ വിവിധ മേഖലകളിൽ റിപ്പോർട്ട്​ ചെയ്​ത പുതിയ കൊവിഡ്​ കേസുകൾ: റിയാദ്​ 168, കിഴക്കൻ പ്രവിശ്യ 87, മക്ക 34, മദീന 14, അൽഖസീം 13, അൽബാഹ 6, അസീർ 6, ഹാഇൽ 6, അൽജൗഫ്​ 5, ജീസാൻ 4, നജ്​റാൻ 4, തബൂക്ക്​ 4, വടക്കൻ അതിർത്തി മേഖല 2.