കോവിഡ്: സൗദിയിൽ രോഗമുക്തരാവുന്നവരുടെ എണ്ണത്തിൽ വൻ വർധന

ജിദ്ദ: സൗദിയിൽ കോവിഡ് ചികിത്സയിലിരിക്കുന്നവരിൽ രോഗമുക്തരാവുന്നവരുടെ എണ്ണത്തിൽ വൻ വർധന. ഇന്ന് 45 പുതിയ രോഗികളും 72 രോഗമുക്തിയും റിപ്പോർട്ട് ചെയ്തു. ഇതുവരെ രാജ്യത്ത് റിപ്പോർട്ട് ചെയ്യപ്പെട്ട ആകെ കോവിഡ് കേസുകളുടെ എണ്ണം 550,088 ഉം രോഗമുക്തരുടെ എണ്ണം 539,277 ഉം ആയി.

പുതുതായി ഒരു മരണം കോവിഡ് മൂലമാണെന്ന് റിപ്പോർട്ട് ചെയ്തു. നിലവിൽ 1,961 പേരാണ് ചികിത്സയിലുള്ളത്. ഇവരിൽ 29 പേർ ഗുരുതരാവസ്ഥയിലാണ്. ഇവർ രാജ്യത്തെ വിവിധ ആശുപത്രികളിൽ തീവ്രപരിചരണ വിഭാഗത്തിലാണ്. ബാക്കിയുള്ളവരുടെ നില തൃപ്തികരമാണ്. രാജ്യത്തെ കോവിഡ് മുക്തി നിരക്ക് 98 ശതമാനവും മരണനിരക്ക് 1.6 ശതമാനവുമായി തുടരുന്നു.

വിവിധ പ്രവിശ്യകളിൽ പുതുതായി റിപ്പോർട്ട് ചെയ്ത രോഗികളുടെ എണ്ണം: റിയാദ് 16, ജിദ്ദ 9, മദീന: 3, ദമ്മാം 3, മക്ക 2, മറ്റ് 12 സ്ഥലങ്ങളിൽ ഓരോ വീതം രോഗികൾ. സൗദി അറേബ്യയിൽ ഇതുവരെ 47,927,386 ഡോസ് കോവിഡ് വാക്സിൻ വിതരണം ചെയ്തു. ഇതിൽ 24,744,729 ആദ്യ ഡോസും 22,730,293 രണ്ടാം ഡോസും 452,364 ബൂസ്റ്റർ ഡോസുമാണ്.