സൗദിയിൽ കോവിഡ്​ പ്രതിരോധം ലംഘിച്ചാൽ വൻതുക പിഴ

ജിദ്ദ: സൗദി അറേബ്യയിൽ കോവിഡ്​ പ്രതിരോധം ലംഘിച്ചാൽ വൻതുക പിഴ​ ചുമത്ത​ുമെന്ന്​ ആവർത്തിച്ച്​ ആഭ്യന്തര മന്ത്രാലയം. ആരോഗ്യ മുൻകരുതലി​​െൻറ ഭാഗമായി ആളുകൾ കൂടിച്ചേരുന്നതിന്​​ നിശ്ചയിച്ചിട്ടുള്ള പെരുമാറ്റചട്ടങ്ങൾ ലംഘിച്ചാൽ ചു​മത്തുന്ന പിഴകൾ തരംതിരിച്ച്​ മന്ത്രാലയം വിശദീകരിച്ചു. വീടിനകത്തോ ഇസ്​ തിറാഹകളിലോ ഫാമുകളിലോ ഒന്നിലധികം കുടുംബങ്ങൾ സംഗമിച്ചാൽ 10,000 റിയാലാണ്​ പിഴ. ഇൗ സ്ഥലങ്ങളിലും തമ്പുകളിലും തുറസ്സായ സ്​ഥലങ്ങളിലും ബാച്ചിലർമാർ കൂട്ടം ചേർന്നാൽ 15,000 റിയാൽ പിഴ ചുമത്തും. 

മരണത്തെ തുടർന്നുള്ള അനുശോചനം, വിവിധതരം പാർട്ടികൾ തുടങ്ങിയ പരിപാടികളിൽ 50ലധികം ആളുകൾ ഒത്തുചേർന്നാൽ 40,000 റിയാലായിരിക്കും പിഴ. വീടിനകത്തോ, നിർമാണത്തിലിരിക്കുന്ന കെട്ടിടത്തിലോ, ഇസ്​തിറാഹകളിലോ, ഫാമുകളിലോ മറ്റോ തൊഴിലാളികൾ കൂടിച്ചേർന്നാൽ പിഴ 50,000 റിയാൽ. താമസസ്​ഥലത്ത്​ അവിടെ താമസക്കാരല്ലാത്ത അഞ്ചിൽ കൂടുതലാളുകൾ ഒത്തുചേരുന്നതും നിയമലംഘനമായി കണക്കാക്കും. കച്ചവട കേന്ദ്രങ്ങൾക്ക്​ അകത്തോ പുറത്തോ ഷോപ്പിങ്ങിനെത്തുന്നവരോ തൊഴിലാളികളോ നിശ്ചയിച്ചിരിക്കുന്ന പരിധിയിൽ കൂടുതൽ ആളുകൾ കൂട്ടം കൂടിയാൽ 5,000 റിയാൽ പിഴ ചുമത്തും. ആരോഗ്യ മുൻകരുതൽ നിർദേശങ്ങൾ പാലിക്കാത്ത സ്വകാര്യ സ്​ഥാപനങ്ങൾക്ക്​ 10,000 റിയാലാണ്​ പിഴ. 

മാസ്​ക്​ ധരിക്കാത്തവരെ അകത്ത്​​ പ്രവേശിപ്പിക്കുക, സ്​റ്റെറിലൈസറുകൾ ഒരുക്കാതിരിക്കുക, മാളുകളിലും കച്ചവട കേന്ദ്രങ്ങളിലും ജോലിക്കാരുടെയും ഉപഭോക്താക്കളുടെയും ശരീര താപനില അളക്കാനുള്ള സംവിധാനങ്ങളില്ലാതിരിക്കുക, ഒരോ തവണ ഉപയോഗിച്ച ശേഷം ഷോപ്പിങ്​ ട്രോളികളും പ്ലാസ്​റ്റിക്​ കുട്ടകളും ശുചീകരിക്കാതിരിക്കുക, കുട്ടികളുടെ കളിസ്​ഥലം, വസ്​ത്രങ്ങളുടെ​ അളവ്​ നോക്കുന്ന സ്​ഥലം എന്നിവ അടച്ചിടാതിരിക്കുക, തറ ശുദ്ധീകരിക്കാതിരിക്കുക എന്നിവയും നിയമലംഘനങ്ങളാണ്​. മാസ്​ക്​ ധരിക്കൽ പോലുള്ള ആരോഗ്യ മുൻകരുതൽ നിർദേശങ്ങൾ മനപൂർവം ലംഘിക്കുന്നവർക്ക്​ 1000 റിയാലായിരിക്കും പിഴ.