കോവിഡ്; സൗദിയിൽ ശനിയാഴ്ച പുതിയ രോഗികളുടെ എണ്ണത്തിൽ നേരിയ കുറവ്

ജിദ്ദ: സൗദി അറേബ്യയിൽ ശനിയാഴ്ച പുതിയ കോവിഡ് രോഗികളുടെ എണ്ണത്തിൽ നേരിയ കുറവ് രേഖപ്പെടുത്തി. പുതുതായി 878 പേർക്ക് രോഗബാധ സ്ഥിരീകരിച്ചു. 578 പേർ രോഗമുക്തി നേടി. രാജ്യത്ത് ആകെ രോഗം സ്ഥിരീകരിച്ചവരുടെ എണ്ണം 3,97,636 ആയി. ഇവരിൽ 3,82,776 പേർക്ക് രോഗം ഭേദമായി. ചികിത്സയിലുണ്ടായിരുന്നവരിൽ 10 പേർ മരിച്ചു. ഇതോടെ ആകെ മരണസംഖ്യ 6,747 ആയി. വിവിധ ആശുപത്രികളിലും മറ്റുമായി 8,113 പേർ ചികിത്സയിലുണ്ട്. ഇവരിൽ 914 പേരുടെ നില ഗുരുതരമാണ്.

ചികിത്സയിൽ കഴിയുന്ന ബാക്കിയുള്ളവരുടെ ആരോഗ്യനില തൃപ്തികരമാണ്. രാജ്യത്തെ കോവിഡ് മുക്തി നിരക്ക് 96.4 ശതമാനവും മരണനിരക്ക് 1.69 ശതമാനവുമാണ്. റിപ്പോർട്ട് ചെയ്ത പുതിയ കേസുകളിൽ പകുതിക്കടുത്തു രോഗികൾ റിയാദ് പ്രവിശ്യയിലാണ്. വിവിധ പ്രവിശ്യകളിൽ പുതുതായി റിപ്പോർട്ട് ചെയ്ത രോഗികളുടെ എണ്ണം: റിയാദ് 410, മക്ക 149, കിഴക്കൻ പ്രവിശ്യ 141, ഹാഇൽ 30, അസീർ 28, മദീന 24, ജീസാൻ 23, തബൂക്ക് 22, അൽ ഖസീം 19, അൽജൗഫ് 9, നജ്റാൻ 8, വടക്കൻ അതിർത്തി മേഖല 8, അൽബാഹ 7.